Bertsoak - Fitxa ikusi Atal honi buruz gehiago jakiteko
2010-05-08 Azkoitia Jaialdia [Bertsoa] / Aitor Sarriegi, Julio Soto
Bertsoa entzun |
2010-05-08 Azkoitia Jaialdia [Bertsoa] / Aitor Sarriegi, Julio Soto
Neurria:
Zortziko txikia (hg) / Lau puntuko txikia (ip)
Kokapena:
XDZ - Xenpelar Dokumentazio Zentroa
A. Sarriegi:
Lehen ta orain mutil
berdinak ginen gu
lehengo bizi maila
baitegu mantendu
diruak betidanik
hori egiten du:
lasaitasuna eman
eta loa kendu. (bis)
J. Soto:
Loa galtze omen da
diruaren truke
hori egia denik
Juliok ez du uste.
Banu zuk aina diru
zuk aina entzute
holako erloju bat
erosiko nuke. (bis)
A. Sarriegi:
Ta aizu erloju hau da
erregalatua
eta zaharragoekin
hobetu tratua.
Badet lanpostu bat ta
badet kontratua
eta ni sentitzen naiz
pribilegiatua. (bis)
J. Soto:
Noizbait ni ere izango
ote naiz zu aina?
Bizitzari hartuko
al diot tamaina?
Sosa zoriona da
zorion bikaina
bestela begiratu
Andoni Egaña. (bis)
A. Sarriegi:
Zoritxarreko asko
nago ikusita
munduan nahi luketen
dena edukita
baina kuriosoa da
gazte hauen pinta
beti negarrez eta
Ternuaz jantzita. (bis)
J. Soto:
Ezin ninteke jantzi
oholtzan itsusi
amak eman zidan hau
galtza eta guzi
ta hala esaten zuen
ez zun arrazoi gutxi:
“Oparitutakoai
hortzik ez ikusi”. (bis)
A. Sarriegi:
Beti xoxaren kejan
hau da hau trastea!
Baina ezagutzen det
oraingo gaztea:
ikasten bukatuta
berriz ikastea
ez al zendun hobea
lanean hastea? (bis)
J. Soto:
Bizitza ez nuke nahi
horrela eskastu
zertan esku politak
sardeakin laztu?
Lan kontua beharko
nuke nik ahaztu
lan eginda ez baita
inor aberastu. (bis)
A. Sarriegi:
Esan dezunarekin
ni jarri naiz adi
ta berriz berresten det
hain dago nabari:
sardeari iheska
zabiltza kantari
ta txapela eskeini
baserritarrari. (bis)
J. Soto:
Ta baserritar denak
eskeintzakin alai
baserritarra nola
agertzen den nun-nahi.
Hemen dudan txanpona
naiz ikusteko gai
jarraitu beharko dut
kukua entzun zai. (bis)
Datu-base honetan eskainitako informazioari buruz jakiteko, kontsultatu lege oharra