Bertsos - Voir fiche Pour savoir plus sur cette section
2005-01-29 Zeanuri Jaialdia [Bertsoa] / Igor Elortza, Jon Maia
Bertsoa entzun |
2005-01-29 Zeanuri Jaialdia [Bertsoa] / Igor Elortza, Jon Maia
Nom de la strophe:
Zortziko handia (hg) / Lau puntuko handia (ip)
Localisation:
XDZ - Xenpelar Dokumentazio Zentroa
J. Maia:
Begira zazu gure aurrera
dena zahar eta heze;
zulo horretan pasa genitun
hainbat hilabete luze;
hirurogei bat urte joan dira
ta barruak ezin ase...
sentsazioak berpiztu zaizkit
atzo balitz bezelaxe.
I. Elortza:
Urteak joan dira ordutik
ta badauka bere fama
gogoratzeko ospakizunez
heldu dira guregana
baina hau dana ikusita nik
gustokoa ez dot dana:
ikuskizuna bihurtu dabe
desastre bat izan zana.
J. Maia:
Heriotzaren menpean ginen
egunetik egunera
ezin jakinik helduko ginen
inoiz hurrengo goizera;
orain bizirik gaudela baina
lagun nere arabera
salbatu ginen gutxiak ere
hilik bizi izan gera.
I. Elortza:
Gu umilatzen ta orden emoten
ebizen hemen hiru-lau
lehenengo egin eixue hori
ta gero barriz egin hau;
diru mordoa sortu genduen
duintasuna galdu arau
ta diru horrek oindino esku
bardinetan segitzen dau.
J. Maia:
Barrakoitatik usaintzen gendun
kamara hoietako gasa
jendea nola eraman zuten
oroitzen ez da erraza.
Denbora joan da ta gaur hor dira
Guantanamo eta Gaza;
mundua ez da lekzio hura
barneratzeko kapaza.
I. Elortza:
Arrazoi dozu lehengo lekuan
jarraitzen dabe problemak
aldatu arren norbanakoak
eta lekuen izenak;
gainera huts bat lez dau barruan
bizirik iraun dabenak
hementxe dagoz lurperatuta
gure urterik onenak.
J. Maia:
Uste genuen ez ginala gu
hori behin pasatzeko gai
txoko hauetan berriz datozkit
hainbat beldur eta usai;
etorri behar gendula baina
ene laguna ai, ai, ai
goazen hemendik inpernu hori
ez det berriz ikusi nahi!
I. Elortza:
Inpernu horrek markatu eta
hementxe gagoz gu biok
ta errudun asko be inguruan
ta hori gorrotoz dinot;
kamaran sartu gasari emon
eta hilko neukez danok
ez neuke holan pentsatu gura
baina holan pentsatzen dot.