Bertsos - Voir fiche Pour savoir plus sur cette section
1998-12-30 Elgoibar Jaialdia [Bertsoa] / Sebastian Lizaso, Jon Maia
| Bertsoa entzun |
1998-12-30 Elgoibar Jaialdia [Bertsoa] / Sebastian Lizaso, Jon Maia
Nom de la strophe:
Zortziko handia (hg) / Lau puntuko handia (ip)
Localisation:
XDZ - Xenpelar Dokumentazio Zentroa
Maia:
Beti hizketa aritzen gera,
inoiz ere ez begira;
hemen bakoitza egokitzen da
posible duen neurrira;
baina ze kristo pasa da orain
telefonoan harira?
Komunikatzen ari ginela
komunikatzen hasi da!
S.Lizaso:
Neu deskuidatu egingo nintzen
teklatxoren bat zapaltzen;
hara laguna hasia nago
aspaldi hontan kezkatzen;
telefonotik sarri hitz egin
bainan ez gera elkartzen,
nik ez dadukat joaterik eta
zu ez baitzera etortzen.
Maia:
Era hortako karga astuna
ez dakit nola eraman;
maitemindurik gaudela hemen,
hortan badegu nahiko lan;
urteak joan eta etorri
beti ari gera teman,
paso pilo bat pasa da eta
pausorik ez degu eman.
S.Lizaso:
Arrazoi dezu eman dezagun
biok aurrera pausua;
ni ez naiz horren ausarta bainan
zerorri ere izua;
ordubetean kontu-kontari,
beti ez da prezisua
ta azkenean beti hotza da
telefonoko muxua.
Maia:
Telefonozko muxu hoiekin
beti gabiltza lagunak;
ez dira gutxi orain artean
hala eman ditugunak!
Gogorarazi nahi ditut kantu
bateko hitz ezagunak:
" Emaizkidazu muxu batzuek
kobrezko zaporedunak".
S.Lizaso:
Behin behar eta ez al zerade
lagun ametsetan ari?
Telefonotik eman ta hartu
aspaldi muxu ugari;
garrantzirikan zertako eman
zuk kobrezko muxuari?
Garaia da ta elkartu orain
guk ezpaina ezpainari!
Maia:
Baina ezpainak urruti daude,
hori ez al da gogorra?
Kabletan zehar hedatzen degu
gure bihotzen altxorra;
zu noizbait hona etor zaitezen
ta ni hurbil nadin horra,
gure esperantza bakarra degu
telefono mugikorra.
S.Lizaso:
Bide hontatik segi ezkero
lagun ez daukagu giro!
Elkar bilatzen saia gaitezen
nahiz eta izan astiro.
Telefonoa nik noiz utziko
aita hor begira dago;
agur maitea bihar goizean
deituko dizut berriro.