Bertsos - Voir fiche Pour savoir plus sur cette section
2012-01-13 Getaria (G) Jaialdia [Bertsoa] / Iñaki Apalategi Astigarraga, Beñat Gaztelumendi, Jexux Mari Irazu Muñoa, Agin Laburu, Alaia Martin, Aitor Sarriegi
| Bertsoa entzun |
2012-01-13 Getaria (G) Jaialdia [Bertsoa] / Iñaki Apalategi Astigarraga, Beñat Gaztelumendi, Jexux Mari Irazu Muñoa, Agin Laburu, Alaia Martin, Aitor Sarriegi
Nom de la strophe:
Zortziko handia (hg) / Lau puntuko handia (ip)
Localisation:
XDZ - Xenpelar Dokumentazio Zentroa
J. M. Irazu
Krisi beltz honen alderdi onak
nola jo litezke begiz?
Zarzuelako kontu ilunak
zeuden argitasun premiz
ze trapu zikin egin zituzten
gehienak jakiten gabiltz.
Hori argitara ez zan irtengo
krisirik izan ez balitz!
A. Sarriegi
Garai batean barra libre zen
maileguak eskatzeko
etxearekin batera oporrak
ta kotxea ekartzeko
peoi soldata izanagatik
biziz patroien antzeko.
Askori ondo etorri zaie
hankak lurrean jartzeko.
B. Gaztelumendi
Ni gaztea naiz ta ezin ditut
hankak eraman lurrera
baina orain zer edukiko det
lehen ez baneukan sobera?
Asteburua heldutakoan
azkenaldian ostera
tragotarako ez daukagu ta
mendira joaten gera.
I. Apalategi
Urteetan lasai bizi izan gera
ze gabezi ta ze krisi?
Txinan ekoiztu gauza guztiak
Euskadin lasai erosi
ta hilabete bukaerara
orain ezin da iritsi.
Behingoagatik ohartu gera
hola ezin dala bizi!
A. Martin
Gutxitu dira bankuen nahiak
ta gutxitu banketeak
kapritxoetan heziak gara
eta ez dira merkeak.
Mesede asko ekarri ditu
nahiz ta eragin kalteak
karteran ez ziren ondo sartzen
bostehuneko billeteak.
A. Rezola
Krisi soinuak entzuten dira
noski bai hemen ta bai han
baino alderdi positibua
jarri bihar degu mahaian:
jendia gutaz akordatzen da
sagardotegi garaian
ta gero eta gehiago datoz
euren penak ito nahian.