Bertsos - Ver ficha Más información sobre esta sección
Heren-sugea (1407) [Bertsoa] / Jean Martin Hiribarren
Heren-sugea (1407) [Bertsoa] / Jean Martin Hiribarren
Dokumentu-mota:
Liburua
Argitalpenaren izenburua:
[Liburua]
Localización:
XDZ - Xenpelar Dokumentazio Zentroa
I
Hedoi bat lehertu
Urdainz inguruan,
Haritz bat ez gelditu
Kapeta buruan:
Babazuza, harria,
Ozpina artetik,
Hedoi izigarria
Suzko zen barnetu.
II
Laster da ilhuntzetan,
Irubi aldetik,
Entzuten beharritan
Ziztu bat zinetik,
Behin ilhun iduri,
Itsaso orroa,
Ez denean ageri
Izarren lerroa.
III
Mehatuaz gerorat
Hain da min altxatzen
Non baitu bihotzerat
Odol dena biltzen.
Ikusi omen dute,
Bai zerbeit ikusi,
Nola alde balute,
Iduria hesi.
IV
Baditu hiru buru,
Bakhotxak eztena,
Oro kharrez inguru,
Agertzen zaiona,
Bizkarretik dario
Harri harrabotsa,
Hezurrez egin dio
Herrestak sahetsa.
V
Begientzat diruri
Harri legundua,
Uharretan igeri
Ferdats gelditua,
Artetan marradia,
Badu xuharxago,
Bizkarrez ingudia
Ez da gogorrago.
VI
Itsusi bezain handi,
Luze bezain makur,
Lur bazterrean gaindi
Dabila ez huzkur.
Gorphutza zaio jartzen
Lau, bortz uztaietan,
Orgak dire ibiltzen
Hura higitzetan.
VII
Gizon eta abere
Oro onak zaizko,
Ezdu uzten deusere
Gaxtoz zintzurreko.
Beldurra da orotan,
Biluz inguruak,
Bi lekhoa erditan
Behera buruak.
VIII
Aita haundien seme,
Seme handiagua,
Ixilik eta erne,
Belzunze Morongua
Buruz zaio joaiten
Heren-Sugeari,
Jan ondoko egiten
Dagola loheri.
IX
Urratsak du atzartzen,
Eta berehala,
Buruz gora da jartzen
Jauzteko bezala.
Sei ximizta begitan,
Luze hogoi pia,
Buztana su-lametan,
Horitsu azpia.
X
Joan zaio ihesi
Belzuntzi muthila,
Berbera da ikusi
Hirriskatzen dela.
Buru bat, lehen lana,
Dio ebakitzen,
Bainan, nahiz arina,
Sugeak du lotzen.
XI
Belzuntze zaio hari
Azpitik sistaka,
Sugea Belzuntzeri
Ezten asikika.
Lehena, ubeldua,
Itsutzen da hantuz,
Sugeak, urratua,
Lan ezin hats hartuz.
XII
Berro bat ez da xutik,
Lana bethi hari,
Suge sabel zaurthutik,
Gizon puska jari.
Khalika eta hilka,
Nihon ezin bara,
Badohaz itzulika
Ur-handi behera.
XIII
Belzuntze itho hola,
Bainan ez ahantzi,
Omen bat ezin hila
Eskaldunei utzi.
Lehenago arraina
Mendiz alhaturen,
Ezen haren izena
Baita ahantziren.
- Urkizu, Patri. "Anton Abbadiaren Koplarien guduak (1851-1897) : Bertso Bilduma". Donostia: Eusko Ikaskuntza, 1997. http://hedatuz.euskomedia.org/4008/