Bertsos - Ver ficha Más información sobre esta sección
2020-04-17 Online Jaialdia (Nafarroako euskal irratiak) [Bertsoa] / Saioa Alkaiza, Xabat Illarregi, Josu Sanjurjo, Julio Soto, Xabier Terreros Gartzia "Terre", Alazne Untxalo
| Bertsoa entzun |
2020-04-17 Online Jaialdia (Nafarroako euskal irratiak) [Bertsoa] / Saioa Alkaiza, Xabat Illarregi, Josu Sanjurjo, Julio Soto, Xabier Terreros Gartzia "Terre", Alazne Untxalo
Nombre de la estrofa:
Zortzikoa, handiaren moldekoa, 4 puntuz (hg) / Lau puntukoa, handiaren moldekoa (ip)
Localización:
XDZ - Xenpelar Dokumentazio Zentroa
A. Untxalo
Lana, bertsoa, musika
margotzeko asti falta
erlojuari begira
haserre eta presaka
orain baineran bi orduz etzan
ta pipak janaz binaka
aprobetxatu beharra daukat
laster bukatuko da ta.
J. Sanjurjo
Ospitaleko gaixotan
langileen imajinak
iruditu zaizkit horren
gogorrak eta gordinak
baina udako pentsamenduak
ditugu geldiezinak
nire kezka da noiz ospatuko
ote diren Sanferminak.
J. Soto
Egun hauetan zalantzak
piztu zaizkit akorduan.
Zer? Noiz arte? Gero nola?
Ta larritzen naiz orduan
ziurtasunik ezak loturik
gauzkanean amarruan
bila ari naiz ia baten bat
aurkitzen dudan barruan.
S. Alkaiza
Balkoietan jaiotako
polizia gorpuztuak
sukaldetako apalak
kontsumismoak puztuak
gaizki bizi dut hori ta ondoko
bizi-lagunen juzkuak
gaude beldurrez beteak eta
askatasunez hustuak.
X. Illarregi
Nahiz ta frigorifikoa
ta tripak egon beteta
nahiz ta egunean eman
zortzirehun ta hogei buelta
nahiz ta egin behar ordenagailuz
karrerako azterketa
ezin kejatu txar-txarrean gu
ongi egon gaitezke ta.
X. Terreros
Goizez lanerako jantzi
artaldearen arropa
karrikan zakurrak libre
etxean haurrentzat soka
pizza bat Globon ta dena zaintzen
polizi militar tropa
eskerrak dena konponduko den
leiho ertzetik txaloka.