Bertsos - Voir fiche Pour savoir plus sur cette section
2009-01-25 Leitza Jaialdia [Bertsoa] / Sebastian Lizaso, Julio Soto
| Bertsoa entzun |
2009-01-25 Leitza Jaialdia [Bertsoa] / Sebastian Lizaso, Julio Soto
Nom de la strophe:
Zortziko handia (hg) / Lau puntuko handia (ip)
Localisation:
XDZ - Xenpelar Dokumentazio Zentroa
J.Soto:
Bizitza aldi berean dugu
arina eta astuna.
Gaur egunean zeinen zaila den
bilatzea neskalaguna!
Prezioz ere gora joan da
etxearen erresuma.
Ez dakit oso garbi dagoen
gazteon etorkizuna.
S.Lizaso:
Helduok ere geure lekutik
behar kontuak atera
ilusioa galtzea beti
hori norbere kaltera.
Jangoikoari kezkak agertu
hau dut oraingo aukera:
bertsolaria izango al naizen
hemendik hogei urtera.
J.Soto:
Izango zara izango zara
ez uste bestelakorik.
Gaur egunean errepideak
daude kontrolez beterik
zuen garaian ez zen faltatzen
Cardhu eta JBrik
ta orain gazteak ez dugu edaten
juergan ura besterik.
S.Lizaso:
Urtearekin ez da izaten
sasoi betean hainbat sen
ta holakotan hanka-sartzeak
izaten dira errezen.
Azken boladan kezka bat daukat
ta ez dit uzten bizitzen:
plazetatikan neu sobratzean
ia ohartuko naizen.
J.Soto:
Pertsonak beti buruhaustea
izaten du hain gertuko
bertsozaleak ta entzuleak
guztiak horren lekuko.
"Jendea ohartu behar ote da
nik plazak utzi orduko?"
Zu lasai egon Julio joango da
ta ez da ezer pasatuko.
S.Lizaso:
Zuk egindako proposamena
ez zan neretzat kaltean
horrela balitz nik a zer poza
nedukakeen bat-batean!
Baina Jainkoai nik galdera bat
egin beharko kolpean:
Juliok ametsik beteko al du
ni bizi naizen artean?
J.Soto:
Treintaiseisetik aurrera horren
gaizki ibili zen ezkerra
zuen garaian nahiz ta Francisco
izan zenuten liderra
gaur egunean euskaldungoa
hain zitala hain okerra!
Guk gerra gabe pasa behar dugu
bigarreneko posgerra.
S.Lizaso:
Gazteak eta helduak ezin
izan kezka beran jabe
kontraesanakin ohartuko zan
hemen bajina bat jende.
Batzuk ez dira nunbait ohartzen
daudela besteren mende
bizi guztian gerran dabiltza
ta berak ohartu gabe!
J.Soto:
Zaharrak dauka irakasteko
ta gaztea ikasteak
nahiz eta sarri beldurtzen duen
horiek ene usteak.
Zu lasai egon ez ditugu-ta
izango buruhausteak
esku beretik joaten bagara
zaharrak eta gazteak.