Bertsos - Voir fiche Pour savoir plus sur cette section
2001-06-02 Elorrio Jaialdia [Bertsoa] / Sustrai Colina, Igor Elortza
Bertsoa entzun |
2001-06-02 Elorrio Jaialdia [Bertsoa] / Sustrai Colina, Igor Elortza
Nom de la strophe:
KOPLEN MULTZOA
Localisation:
XDZ - Xenpelar Dokumentazio Zentroa
Colina:
Kezka bat dut barrenean
ta esango dut azkenean
orain zuzen-zuzenean:
itzala soilik ez dut ikusten,
nahiz fuerte jardun lanean.
Aizu, itzala joaten ote da
txapela heltzen denean? (bis)
I. Elortza:
Heldu txapelen leienda
ta itzala joaten da,
agur penaren leienda!
Baina badakit zu bertsoetan
zara behar ainako prenda,
ta lasai Sustrai, lana ondoen
itzalean egiten da. (bis)
Colina:
Galdua daukat patxara,
nigan sortu da ikara,
normala da beharbada.
Itzalean nik lan egiten dut
txinurri baten gisara.
Halare lanak ez du balio
gero luzitzen ez bada. (bis)
I. Elortza:
Gerta leike beharbada,
baina pentsa zazu, hara:
hartu duzu abiada.
Lehen esan dizut: lanik onena
eiten da itzaletara
eta lan horrek luzituko du
argia baldin bazara. (bis)
Colina:
Txapela nahiz den saria,
hori da gauza handia
ta lortzea miraria!
Oraindik ere nik ez dut jaso
bersotako oparia.
Nere ametsak ilunak dira
eta Amets da argia. (bis)
I. Elortza:
Izan liteke problema
horren moduko eskema,
beraz ahaztu zazu dena.
Zeure buruan konfidantza izan,
horixe duzu aurrena,
eta ez pentsa goitik ikusten
dena denik politena! (bis)
Colina:
Aurrea eta atzea,
irabazi ta galtzea...
ez da aisa azaltzea!
Unai ta Amets, Amets ta Unai
gu biontzako trantzea...
Onen-onena izango dugu
Eskoziara bialtzea!* (bis)
I. Elortza:
Pasa dira hainbat urte,
nik bildu mila birtute,
sarri portatu naiz putre.
Ta honek ere itxura baten
nahi luke mila azukre...
txapela utzi ta beharbada
gona jantzi behar luke. (bis)