Bertsos - Voir fiche Pour savoir plus sur cette section
2012-10-06 Iurreta Jaialdia [Bertsoa] / Miren Amuriza, Amets Arzallus
| Bertsoa entzun |
2012-10-06 Iurreta Jaialdia [Bertsoa] / Miren Amuriza, Amets Arzallus
Nom de la strophe:
Zortziko handia (hg) / Lau puntuko handia (ip)
Localisation:
XDZ - Xenpelar Dokumentazio Zentroa
A. Arzallus
Munduko zenbat bazter gordetan
ez edari ta ez jangai!
Eta bizitza kostata baina
aurrerantza eraman nahi
eta haiekin konparatuta
nik sarri pentsatzen dut ai
gu aberatsak garela baina
oso behartsu ere bai.
M. Amuriza
Ez da erraza etxetik kanpo
zer dagoen jakitea
nahiko zeregin ta buruhaustez
dago gure lur maitea.
Krisia ez da hartu beharra
jateko nahiko merkea
krisia baita zer janik ere
ia-ia ez eukitea.
A. Arzallus
Igual krisia hori bera da
goizeroko jan eskea
ta zoritxarrez horrela dabiltz
bai bata ta bai bestea
baina badago beste krisi bat
hala da nere ustea:
zenbat daukazun ez jakin eta
besteak ez ikustea.
M. Amuriza
Zenbat daukagun apreziatzen
ez dogu ikusi tamalez
ta bat-batean ekonomia
guztia dogu aldrebes.
Etiopian ez da dirurik
eta zer janik ere ez
eta halan be ia inortxo
ez zan ikusten negarrez.
A. Arzallus
Pentsa ezazu zer alde dagon
iparraldetik hegora
hura da gure lehengaien lur
dirua eta denbora
hura da gure basura haundi
dena doa han zulora
baina bizitza berri bat ere
handikan etorriko da.
M. Amuriza
Hona etorri ta badirudi
dana dagoela txarto
ez da ba izango orain artean
gu egon garela bapo.
Kalkulau zenbat diru dozuen
zuek gaur parrandarako
urte osoa litzake hori
han famili batentzako.
A. Arzallus
Errexena da telebistara
jarri ta sofan eseri
baina hura da gure aldeko
aberats denen miseri
hori da gure bizitza honen
min ematen duen egi
baina arrazoirik ez die kentzen
gure eskakizuneri.
M. Amuriza
Asko ta askori kendu deutsiez
makina bat diru sari
eta gatxa da baikortasunez
begiratzea danari.
Pentsau ez arren esku artean
daukaguz gauza ugari
daukazuena apreziatu
ta lagundu ez daukanari.