Bertsos - Voir fiche Pour savoir plus sur cette section
2022-12-18 Iruñea Txapelketa 11:00 [Bertsoa] / Joanes Illarregi, Aitor Mendiluze
Bertsoa entzun |
2022-12-18 Iruñea Txapelketa 11:00 [Bertsoa] / Joanes Illarregi, Aitor Mendiluze
Nom de la strophe:
Zortzikoa, berdinaren moldekoa, 6 puntuz (hg) / Sei puntukoa, berdinaren moldekoa (ip)
Localisation:
XDZ - Xenpelar Dokumentazio Zentroa
J. Illarregi
Lotuta zaude katean
gure etxeko atean
ta jarraitzea aipatu duzu
duzula kaltean
hori bota bapatean
malkotan, negar batean
esan zaidazu ze eskatzen duzun
lerroen artean! (bis)
A. Mendiluze
Tarteka maitasun hitza
lasai entzuteko ditxa
ez nuke zertan ezer aldatu
posible balitza.
Egoera da bortitza
sufritzen denok gabiltza
berririk ezin hasi ta zaharra
ez baita bizitza. (bis)
J. Illarregi
Benetan kasu bitxia
begi bazterra itxia
azken aldian hiru famili
gisan gabiltz ia.
Bikotearen krisia
belarrira iritsia
zuk zer nahi duzu nire laguntza
edo iritzia? (bis)
A. Mendiluze
Ez gozo ta ez maitasun
hitzik aspaldian entzun
eta badakit zuri ere nola
ailegatu zaizun
nahiz ta zalantzak dauzkazun
ez galderekin erantzun
gauza bakarra nahi det Joanes
ulertu nazazun. (bis)
J. Illarregi
Hala izan beharko da
ez bazabiltza gustora
nahiz gogorra den berriz hastea
berrogeitik gora
joan zaitez edonora
gure etxetik kanpora
ta lasai ama, bilduko gara
elkarren ondora. (bis)
A. Mendiluze
Aita ta biok ez gaude
aspalditik parez pare
baina argi bat ikus nezake
ondoan bazaude
aukera askoren jabe
ez naiz ni baina halare
ia egiten asmatzen dedan
inor mindu gabe. (bis)