BDB Bertsolaritzaren datu-basea

Informazio orokorra

Kategoria

Ez bat-batekoa

Bertsolariak / Egileak

Amuriza, Miren

Deskribapena

Izenburua

Borobilak

Dokumentuan jasotako izenburua

Borobilak

Dokumentuan jasotako bertsoaren hasiera

Gaurkoan gauza borobiletaz kantatu nahi nizueke,

Doinua

Gregario edo laguntzaile naiz

Neurria / Estrofaren izena

Hamabikoa, handiaren moldekoa, 7 puntuz (hg) / Zazpi puntukoa, handiaren moldekoa (ip)

Bertso kopurua

6

Bertso dokumentu mota

Hemeroteka (Aldizkari eta Egunkariak)

Edukia

Interneten

http://www.argia.com/argia-astekaria/2320/borobilak

Kokapena

Kokapena

XDZ - Xenpelar Dokumentazio Zentroa

Argitalpen datuak

Argitalpenaren izenburua

Argia [Aldizkaria]

Liburukia / Urtea

75

Zenbakia

2320

Orrialdeak

22

Argitalpen / inprimatze data

2012-04-29

Borobilak [Bertsoa] / Miren Amuriza

Neurria:  Hamabikoa, handiaren moldekoa, 7 puntuz (hg) / Zazpi puntukoa, handiaren moldekoa (ip)  Dokumentu-mota:  Hemeroteka (Aldizkari eta Egunkariak)  Argitalpenaren izenburua:  Argia [Aldizkaria] Argitalpen data:  2012-04-29 
Kokapena:  XDZ - Xenpelar Dokumentazio Zentroa 

---

I
Gaurkoan gauza borobiletaz
kantatu nahi nizueke,
unibertsoan zintzilik daude
handienak erortzeke,
planeta gori, eguzki gorri
edota ilargi bete,
forma bera ei daukate
ondo ezagutu arte. (bis)
Zeren denborak ikuspegia
guztiz aldatu lezake,
zuek mundua borobila den
horren ziur al zaudete?
II
Telazko poltsa baten gordetzen
gendun kanika dozena,
tenis pilota berde-berdea
teilatura joan zena,
auzokoaren baloi berria
zurietan-zuriena...
Jolastokian barrena,
zenbat ume, hainbat dema. (bis).
Irriak eman ta bueltan jaso
hortxe laburtzen zen dena;
jolastea da inondik ere
ekintza borobilena.
III
Urrats batean jolas zelaitik
gudu zelaira igarota:
alde batean gazte koadrila
ta bestean ertzain tropa,
gazteenganantz jaurti dituzte
ehunka gomazko pilota,
berdin zaie nora bota,
kalteak ez die inporta. (bis)
Horrexegatik egiten dugu
uniformedunen kontra,
pilotakada hoien atzean
joko zikina dago ta.
IV
Hilabetean marra gorriak
bi aldiz zituzten pasa,
mutil bat larri utziz Gasteizen
ireki zen trumoi kaxa,
gero heldu zen Athletizale
baten azkenengo arnasa,
ertzainen pilota jasa
ulertzea ez da erraza. (bis)
Nor da konorte bako gazte bat
porraz jotzeko kapaza?
Okerrena da beraientzako
horixe dela jolasa.
V
Guztiok geunden agintarien
erantzunari begira,
Varela eta Ares agertu
ziren ohi duten neurrira,
hainbat lekukok esandakoa
tinko zuten erretira,
sokari tira ta tira
eurek nahi zuten tokira. (bis)
Haien gezurrak hitz finak hitz fin
eta dizdirak dizdira,
pilotakadak bezain borobil
eta mingarriak dira.
VI
Agintariek berba lauekin
egindako teatroa,
gezur borobil baten dizdira,
pilotaren zartakoa...
Denak batuta sor dezaketen
mina da sekulakoa.
Aurki dezagun gakoa
eraldaketarakoa. (bis)
Zeren nahiz eta planeta izan
esferak bezalakoa,
oraindik ere gizarte hau da
piramide formakoa.