Bertsoak - Fitxa ikusi Atal honi buruz gehiago jakiteko
2010-12-18 Barakaldo Txapelketa [Bertsoa] / Miren Amuriza, Peio Ormazabal
| Bertsoa entzun |
2010-12-18 Barakaldo Txapelketa [Bertsoa] / Miren Amuriza, Peio Ormazabal
Neurria:
Zortziko handia (hg) / Lau puntuko handia (ip)
Kokapena:
XDZ - Xenpelar Dokumentazio Zentroa
P. Ormazabal
Txikia izan arren baduzu
bizirauteko aukera
aita ta ama zure alboan
egongo gara gainera
gogorra dela badakit baina
pozik egizu aurrera
ni ere hiltzen ari naiz Miren
zure barreaz batera.
M. Amuriza
Ondoan dauzkat zure besoak
eta hiru papinatxo
begiak itxi ta aurpegia
laztanduaz mantso-mantso
nahiz eta nagon ilerik barik
ta etsita egon atzo
zure ondoan ezen beldurrik
ez dot izaten amatxo.
P. Ormazabal
Bizitza zer ba da hain gogorra
hain txarra ta hain krudela?
Zuk ikusi behar zenuke Miren
zure amaren eskela
begiak itxi ta sinits zazu
nahiz gauza ez den horrela
eman dizudan besarkada hau
betiko izango dela.
M. Amuriza
Heriotzari buruz pentsatzen
jarri izan naz tarteka
baina ezin da neurtu guregan
sortu dauan desoreka
ama ez dakit nundik eragin
egoera honi buelta
ispilu aurrean neure burua
ez dut ezagutzen eta.
P. Ormazabal
Baina ezagutu ahal duzu Miren
nire begien ertzean
zure gelako kuadrotan eta
zure amaren etxean
eta zergatik erori behar
dugu orain oinazean
bizi oso bat dagoelako
zure laztan bakoitzean.
M. Amuriza
Ikasi behar dodaz aurrera
egiteko mila truko
jarri Porrotxen diskoa martxan
kanta dezagun ta punto
ondoan daukat familia bat
eta mila lagun hurko
bizia emon zenidan eta
ez dot alperrik galduko.
Datu-base honetan eskainitako informazioari buruz jakiteko, kontsultatu lege oharra