Bertsoak - Fitxa ikusi Atal honi buruz gehiago jakiteko
2013-01-06 Oiartzun Jaialdia [Bertsoa] / Igor Elortza, Jon Maia
| Bertsoa entzun |
2013-01-06 Oiartzun Jaialdia [Bertsoa] / Igor Elortza, Jon Maia
Neurria:
Zortziko handia (hg) / Lau puntuko handia (ip)
Kokapena:
XDZ - Xenpelar Dokumentazio Zentroa
J. Maia
Hamasei urte izango dira
edo gehiago agian
ximur berriak irtengo ziren
gutakoen aurpegian.
Hitza berriro errepikatuz
plaza haundi honen erdian
gure hizkuntza eraiki degu
borrokaren hiztegian.
I. Elortza
Elkartasuna ta besarkada
senideak ta herria
hitz hoien bueltan eman dugu guk
gure ibilbide erdia
baina kontzeptu berri asmatzen
zertan bota izerdia?
Hutsunea ere egunero da
zaharra baina berria.
J. Maia
Gure errima jarri ohi dugu
kartzelan edo juezan
nahiz eta beti etortzen geran
ez gatoz inoiz perezan
ta hitzak ez dira inoiz gastatzen
errepikaren lainezan
indar berria hartzen baitute
zenbat ta gehiago esan.
I. Elortza
Bertsolariak beti behar du
sentimendu ta zentzumen
hamasei urte ziren berberak
igual bota ditugu lehen.
Badakizue bertsolariak
presoa nola maite duen
guk badakigu dakizuela
berriz esan nahi genuen.
J. Maia
Bertso barruan agertzen dira
sentimentu eta kate
beste hainbat aldiz esan ditugu
"Aurrera" eta "Jo ta ke"
ta zenbat aldiz "Ongi etorri"
zenbat aldiz etortzeke!
Laister kantatu behar ditugu
"Gurekin" eta "Zaudete".
I. Elortza
Bertsoak ahalik baldin baleuka
denak hona ekartzeko
gaur premiarik ez luke inork
Elorsorora sartzeko.
Biok gogoa badugu noski
hitz berritan ausartzeko
bada garaia herri zahar honi
bertso berriak jartzeko!
Datu-base honetan eskainitako informazioari buruz jakiteko, kontsultatu lege oharra