Bertsoak - Fitxa ikusi Atal honi buruz gehiago jakiteko
Ikusten ez diren kateak [Bertsoa] / Jon Aizpurua
Ikusten ez diren kateak [Bertsoa] / Jon Aizpurua
Neurria:
Hamabikoa, handiaren moldekoa, 8 puntuz (hg) / Zortzi puntukoa, handiaren moldekoa (ip)
Argitalpenaren izenburua:
Noaua [Aldizkaria]
Kokapena:
XDZ - Xenpelar Dokumentazio Zentroa
Jaio orduko berdin garela
Ez da seinale onena
Zerbait hainbeste errepikatuz
Zer da ezkutatzen dena?
Atzean utzia zena
Egun iraganarena
Sufritu zuten miseria da
Testigantza krudelena
Arrox, urdin da biena
Errespetuzko eskema
Baina logela panpin arroxez
Josi zidaten den-dena.
Eskolan ere ez pentsa dena
Arrox koloreko denik
Disimuloan mutilentzako
Bada pribilegiorik
Orain gogora datorzkit
Begiratuaz hemendik
Indar ta kemen hitzak kenduta
Zeuden gure hiztegitik
Hogei neskatootatik
Zalantza asko dauzkat nik
Zergatik ez da ingeniaritza
Ikasitako neskarik?
Baina aukera berdintasuna
Boladan dugun hitza da
Eta lanean kostatu arren
Aukera iritsi hara!
Itzalpeko lana laga
Bulegodun jefa zara!
Eta lehenengo zurrumurrua
“Nola iritsi da hara?”
“-ohe kontuen aupada?”
“-faboreak beharbada?”
Urte luzetan egin den lanak
Non du zuen begirada?
Eta tarteka tokatzen zaigu
Bilera bat edo beste
Korbata asko ikusten dira
Takoiak ez horrenbeste
Askotan hitzaren eske
Ixiltasuna erbeste
Gutaz oroitu gabe ordu ta
Egunak pasa litezke
Horrenbeste gutxieste
Ikaste eta ameste
Eder ta ixil gauden artean
Bileran egon gaitezke.
Parrandarako ere prestatu
Izan gara inoiz eder
Baina ispilu aurrean ezetz,
Jartzazu beste zeozer
Eskote barrura uger!
Gona motza dena izter!
“Gero gizonek ze kulpa dute?”
Dio inork muturroker.
Nere bizitzako txofer
Badauzkat hainbeste maizter
Zer jantzi beldur izango banaiz
Hemen bada zerbait oker
Kalean obrak, andamioak
Ta “kontuz” dion kartela
Zerbait burura eroriko den
Beldurrak gerran bezela
Ze neska tonta, ergela!
Da gremioen epela!
Piropoak ta baba sorta bat
Gizonkeri karrusela
Utzia dute zintzela
Nahiago nire okela
Okerrena da eguneroko
Eszena bihurtu dela.
Euskarak badu hitz bat laburra
Ta erraz dena ulertzen
Batzutan ixil esaten dena
Beste batzuetan ozen
Dena garden, dena zuzen
Erraz ulertu gaitezen
Eta edonork beharko luke
onartzeko adina sen
bai Iruñan, bai Gasteizen
denetan hitz berbera zen
EZ esatea ez al da aski
Behingoz geratu zaitezen.
Zorionean zoritxarretik
Izpitxoa sortu hara!
Lur idorretik lore ederrak
Paradoxa berbera da
Gaindituz dugun ikara
Akabo hanken dardara
Ilun denean etxeratzeak
Ezin du bihurtu traba!
Amets berrien alaba
Errotik dena eralda
Beldurrak bandoz aldatuko du
Orain manada gu gara!
Datu-base honetan eskainitako informazioari buruz jakiteko, kontsultatu lege oharra