Bertsoak - Fitxa ikusi Atal honi buruz gehiago jakiteko
Solferinoko itsua [Bertsoa] / M.A. Salaberri
Solferinoko itsua [Bertsoa] / M.A. Salaberri
Dokumentu-mota:
Liburua
Argitalpenaren izenburua:
Anton Abbadiaren koplarien guduak (1851-1897) : Bertso Bilduma [Liburua]
Kokapena:
XDZ - Xenpelar Dokumentazio Zentroa
I
Harmen hartzera deitu ninduen gazterik zorte etsaiak,
Urrundu nintzen, herrialderat itzuliz usu begiak,
Itzuliz usu begiak.
II
Zorigaitzean baitut ikusi Solferinoko hegia!
Alferretan dut geroztik deitzen iguzkiaren argia,
Iguzkiaren argia.
III
Nihoiz enetzat ez da jaikiren goizeko argi ederra,
Zeru gainetik nihoiz enetzat dirdiraturen izarra,
Dirdiraturen izarra.
IV
Bethiko gaua (gau lazgarria!) begietara zait jautsi,
Ene herria, ene lagunak nihoiz ez behar ikusi...!
Nihoiz ez behar ikusi!
V
Ene amaren begi samurrak bethiko zaizkit estali,
Maiteñoaren begithartea behin bethiko itzali...
Behin bethiko itzali!
VI
Ez aipha niri landa hegitan sortzen den lili ederra,
Othoi ez aipha ur axalean arinik dohan ainhara,
Arinik dohan ainhara.
VII
Larrainetako haritz, gaztaina, mendietako ithurri,
Horiek oro enetzat dire amets histu bat iduri,
Amets histu bat iduri.
VIII
Herriko bestan, gazte lagunak kantuz plazara dohazi,
Eta ni beltzik, etxe zokhoan, irri egiten ahantzi!
Irri egiten ahantzi.
IX
Oraino gazte,gogoz ez hoztu, eta biziak lotsatzen...
Dohabea! zer eginen dut Jaunak ez banau laguntzen?
Jaunak ez banau laguntzen?
X
Ai aski hola! Jainkoa, barka! begira zure haurrari,
Kontsolamendu zerbait emozu, noizbait duzun urrikari,
Duzun noizbait urrikari.
Urkizu, Patri. "Anton Abbadiaren Koplarien guduak (1851-1897) : Bertso Bilduma". Donostia: Eusko Ikaskuntza, 1997, 202 or. http://hedatuz.euskomedia.org/4008/
Datu-base honetan eskainitako informazioari buruz jakiteko, kontsultatu lege oharra