Bertsoak - Fitxa ikusi Atal honi buruz gehiago jakiteko
2022-10-22 Elizondo Txapelketa [Bertsoa] / Alaia Martin
| Bertsoa entzun |
2022-10-22 Elizondo Txapelketa [Bertsoa] / Alaia Martin
Neurria:
Hamalauko berdina, 7 puntuz eta 8 silabaz (hg) / Zazpi puntuko berdina 16 silabaz (ip)
Kokapena:
XDZ - Xenpelar Dokumentazio Zentroa
Goiz berezia denean
pertsiana da beruna
ta ezin armairuan gorde
nire mamuen bilduma
beti ez dugu goxoki
hartu ohi datorkiguna
ta gaur tunel amaiera
ere ikusten dut iluna.
Lehen sendo sentitzen nintzen
orain sentitzen naiz luma
baina esku gainean dut
amaren esku biguna (bis)
gaur dut eskola haundiko
nire lehenengo eguna.
Besteek ze esango dute?
Egingo al didate traba?
Denak ni bezain izuti
ote datoz eskolara?
Nahiz pardela kendu dudan
kaka eginda nago jada
arnasa sakon hartzea
da onena beharbada.
Ama adi-adi daukat
nigan bere begirada
eskutan suma nezake
bere bero ta taupada (bis)
eskuak batuta sortzen
da arima-besarkada.
Eskolarantza goaz ta
zenbat ume garraxika!
Ni diximuloan sendo
ez nabil negar antsika
maistra berri bat daukagu
ta egin nahi diot bisita
bizitza ederragoa
baita ausardiz bizita.
Ta eskua askatu dit
nik hartu dut ziur pinta
pentsatu nahi dut gaurkoa
dugula egun polita (bis)
noizbaiten erortzen banaiz
eskua helduko dit ta.
Datu-base honetan eskainitako informazioari buruz jakiteko, kontsultatu lege oharra