BDB Bertsolaritzaren datu-basea

Informazio orokorra

Kategoria

Bat-batekoa

Saioa

2023-03-04 Usurbil Lagun-artekoa

Gai-jartzailea

Agirre, Amaia

Bertsolariak / Egileak

Alkaiza, Saioa

Uria Albizuri, Jone

Lana

Binaka gaia-emanda

Jarritako gaia

Adineko bi emakume zarete, urteak zuen jatorritik kanpora eman dituzue. Baina alargundu ondoren, zuen azken urteak pasatzera herrira itzuli zarete, Usurbila. Elkar ezagutu zenuten gaztetan baina ez zenuten harreman esturik eduki. Bakoitza ze familiatakoa zen bazekien besteak, baina hortik aurrera elkarren berri handirik ez zenuten. Jubilatu etxean elkartzen zarete ia arratsaldero, batez ere hotz egiten duenean. Harremana estutzen ari zarete, nahiko erreserbatuak dirudizue baina gaur atera duzue zuen bizitzan pisu izugarria izan duen gaia: politika, herria, senarrak. Saioa zure senarra etakidea izan zen; ihesi lehenik eta preso gero. Jone, zure senarrak urte askotan izan zuen bizkartzain bat bizikide. Elkarrekin paseatzen zoazte, apenas begiratzen diozue elkarri, baina bat besteari norbere bizitza kontatzen ari zaio.

Deskribapena

Doinua

Gizakiak harri bat

Neurria / Estrofaren izena

Hamarreko txikia (hg) / Bost puntuko txikia (ip)

Kokapena

Kokapena

XDZ - Xenpelar Dokumentazio Zentroa

Bilduma / Funtsa / Proiektua

Bapatean Bilduma

2023-03-04 Usurbil Lagun-artekoa [Bertsoa] / Saioa Alkaiza, Jone Uria Albizuri

Neurria:  Hamarreko txikia (hg) / Bost puntuko txikia (ip) 
Kokapena:  XDZ - Xenpelar Dokumentazio Zentroa 

---

J. Uria
Herriko pankartetan
oihuak ta lemak
zer eta nola egin
gizonen dilemak
hori markatzen zuen
garaiak, sistemak
ta gure sentipenak
ahotik irtenak
hain ezberdin eta hain
antzeko direnak. (bis)

S. Alkaiza
Ene herri bakarrean
zenbat unibertso!
Zuk bizkartzaina ta nik
kontzentra ta bertso
berdin baina ezberdin
ta halare intenso
senarrak hain loturik
hanka eta beso
baina ni egon nintzen
urteetan preso. (bis)

J. Uria
Preso egon zinela
urteetan zer suma
lau horma ez baitira
noski erresuma
nigan aldiz beldurrak
a ze oihartzuna!
Kotxepean begira
eztanda entzuna
beldurrez bizitzea
ez da askatasuna. (bis)

S. Alkaiza
Gurea abokatu
eta dohakabe
politikak bihurtu
zuena mirabe
senarrak lurpean ta
gu hementxe gaude
azkenean zer gara
ba biak goi ta behe?
Aukeratu gabeko
zigor baten jabe. (bis)

J. Uria
Kartzelara bisitan
pasata asteak
niri beldurrak sortu
nire desgasteak.
Arrazoi! Ez gara izan
sekula askeak
ta berdin orain edo
ginela gazteak
besteen begitan gara
euren emazteak. (bis)

S. Alkaiza
Emazte baina ez gara
esan duzu lasai
hurkotzat zaitut eta
ez zara nere etsai
baina bake garaiak
antzuak dira ai!
Paseo bat? Ba ados
egin deigun zernahi
baina halare ez dut
laguna izan nahi. (bis)

J. Uria
Lagun izan nahi baina
igual izan ezin
garai batek sortua
gugan hainbeste min
lagun ez baina segi
nahiko nuke berdin
tarteka mintzatuaz
hartuaz atsegin
ze honi buruz edonon
ezin da hitz egin. (bis)

S. Alkaiza
Ezin da ezer esan
mina garraioa
tertulia bat edo
irrati saioa
mina nola edonon
aspaldi jaioa
gu ez gara biktimak
ta ez entsaioa
baizik izen ta abizen
Jone ta Saioa. (bis)