Bertsoak - Fitxa ikusi Atal honi buruz gehiago jakiteko
1995-01-06 Hernani Jaialdia [Bertsoa] / Jon Eizmendi, Sebastian Lizaso
| Bertsoa entzun |
1995-01-06 Hernani Jaialdia [Bertsoa] / Jon Eizmendi, Sebastian Lizaso
Neurria:
Zortziko txikia (hg) / Lau puntuko txikia (ip)
Kokapena:
XDZ - Xenpelar Dokumentazio Zentroa
S.Lizaso:
Nere intentzioak
ziran nabarmenak,
baina ezin domatu
nik honen kemenak.
Asko dira oraindik
hau ez dakitenak:
jangarriak ez dira
animali denak.
Eizmendi:
Gizon jakia ere
oso det graziko,
horrelako piezarik
noiz zan ikusiko!
Bertatik alde egiten
ez diot utziko,
nahiko jakia badet
nik negu guziko.
S.Lizaso:
Aspaldi heldu nintzan
zuen parajera,
ta galdu dutxatzeko
lehen nuen aukera.
Garbitu gabe sartu
zuk zure pertzera,
hasi hanketatikan,
aspertuko zera!
Eizmendi:
Pertza txikiak kasi
egin du enbazu,
oso lodia zaude
hala dirudizu.
Behetik eman nahi diot
ahal baldin bada su,
metxerorik ez det ta
puru hoi ekazu.
S.Lizaso:
Ni ohartu berri naiz
beronek esanda,
egin beharko diot
neronek demanda.
Sua pizteko ere
gero omen txanda,
Bizkaiko txerriana
selban pasako da.
Eizmendi:
Laster egosiko det
honi su emanik,
jateko esperantza
behintzat badaukat nik.
Holako lodi eta
zabala izanik,
gizenak apartatzen
ez daukagu lanik.
S.Lizaso:
Ni kolpetik jatea
zuretzat kalteko,
nola tribu guztia
ez dezun beteko.
Armak ere badauzkat
ehizera joateko,
neuk ekarriko dizut
nahikoa jateko.
Eizmendi:
Holako ehiz onikan
noiz zan bereziko?
Tribu honek ez al zun
hainbat mereziko?
Esan dizut, ez dezu
hortik igesiko,
zure hezur askorik
ez dut ikusiko.
S.Lizaso:
Kanibal honek ez du
normalan itxurik,
sua pizteko ere
ez baitu bururik;
ez metxero, ez poxpolo,
ez daduka surik,
euria hasi du-ta
ez dut arriskurik.
Eizmendi:
Lehenago Bizkaikoa
aipatu duela,
orain jarraitu nahi det
nik lehengo nobela,
eta esango dizut
Lizaso honela:
bizarrez sutuko det
txerria bezela.
Datu-base honetan eskainitako informazioari buruz jakiteko, kontsultatu lege oharra