Bertsoak - Fitxa ikusi Atal honi buruz gehiago jakiteko
2000-09-30 Elgoibar Jaialdia [Bertsoa] / Jexux Mari Irazu Muñoa, Sebastian Lizaso, Aitor Mendiluze
| Bertsoa entzun |
2000-09-30 Elgoibar Jaialdia [Bertsoa] / Jexux Mari Irazu Muñoa, Sebastian Lizaso, Aitor Mendiluze
Neurria:
Hamarreko handia (hg) / Bost puntuko handia (ip)
Kokapena:
XDZ - Xenpelar Dokumentazio Zentroa
Irazu:
Larraulen jaio, izana igoal
paraje lorez betea,
mendialdeko bizimodua
ez baita beti kaltea;
txarrerako ta onerako're
bitarako da zortea,
neri bizitzak zer oparitu...
zer nahi dezu esatea?
Oparirikan haundina izan da
bersolari izatea. (bis)
S. Lizaso:
Jaio ondoren aman tititik
hamaika trago egina!
Ume izana, gero mutiko,
hori da gauza jakina;
mutiko denak gizon izan nahi,
hau betiko ahalegina;
opari gisa bertsoen sena
geurekin daukagu baina,
gu ez ginaden ezer izango
geu saiatu ez bagina. (bis)
Mendiluze:
Gazteak beti bikotea nahi
izaten du bere jiran,
bizitzak eman ohi dun opari
onena nola hori dan.
Nik lortu nuen maitemintzea
ta hara gauzak zer diran:
istripu latz bat izan zun baina
ondo jarri zen segidan;
beraz bizitzak andregai bera
bitan oparitu zidan. (bis)
Irazu:
Etxean inoiz ez ditut falta
maitasuna ta jatena;
hemezortzi urte bete nitun ta
nere kasara hurrena;
lagunak asko, onak ere bai,
baina hori ez da dena;
atzokotikan ase ezin denez
pertsona baten barrena,
oaindik heltzeko egon dedila
oparirikan onena. (bis)
S. Lizaso:
Nahiz ta onena bidean izan,
lehen jasoa nabarmena:
Euskadi omen da Europa aldean
herrialderik zaharrena,
ta nortasuna gorde duena
hainbat mendetan barrena;
jarraitu nahia ez ote degu
iraganak dakarrena?
Euskal Herrian jaio izana
oparirik ederrena. (bis)
Mendiluze:
Ni ikasten ta lanean nabil,
ez alperkeri hutsean;
bertso saio bat ere badaukat
behar dedan bakoitzean;
lagun artean maiz ibiltzen naiz
ta maite naute etxean;
beraz bizitza oraingoz behintzat
doa nahi dudan antzean,
ta opari bat berriz hartzen det
eguna sortzen denean. (bis)
Irazu:
Beste opari bat izan liteke
dexente biajatzea;
ezagutzen det Inglaterra ta
Egipto aldeko trantzea;
batzutan aldiz ez da txarrena
etxe bueltan gelditzea;
igoal onena nahiz ta ez izan
ez nuke nahi zuritzea,
oso detalle polita izan da
San Migel ezagutzea. (bis)
S. Lizaso:
Zer da opari, zer da patua
tarte txiki bat tarteko?
Diferentzia nun ote dagon
ez naiz kapaz esateko;
bertsolari naiz, bestela ez zen
nere patua beteko;
bertsolarian seme ta aita,
hau ez da nere kalteko,
eta bertsoak aukera eman dit
zuen lagun izateko. (bis)
Mendiluze:
Neronek ere bertsoarekin
ia badet zor ugari,
hala sentitzen nuelako ni
egin nintzen bertsolari;
zuek ta beste askon aurrean
jardun izan naiz kantari
eta etxera pozik joango da
gaur zuentzat dena ari,
zuen irriak eta txaloak
baditu gaurko opari. (bis)
Datu-base honetan eskainitako informazioari buruz jakiteko, kontsultatu lege oharra