Bertsos - View details To know more about this section
1993-12-19 Donostia Txapelketa 11:30 [Bertsoa] / Xabier "Euzkitze"
| Bertsoa entzun |
1993-12-19 Donostia Txapelketa 11:30 [Bertsoa] / Xabier "Euzkitze"
Stanza name:
Neurri luzekoak
Localization:
XDZ - Xenpelar Dokumentazio Zentroa
Droga maltzurrak orain jarri nau
gaizkile maltzurren pare,
hontara heldu nintekeenik
ez nuen uste halare;
nere amaren pitxien bila,
ez al da nahikoa grabe?
Aizu droga dohakabe,
indartsuegia zaude: (bis)
zu egin zara nere amets eta
ekintza guztien jabe,
bizimodua desertu huts bat
iruditzen zait zu gabe. (bis)
Nola izan naiz hain kaxkarina?
Nola izan naiz hain txepela?
Guztiari "bai!" esaten nion,
zetorrena zetorrela;
baina gehiegi da gaurkoa ta,
ezin dut segi horrela;
ez nun pentsatuko bela
hontara helduko nintzela. (bis)
Ama maitea, barka zaidazu
zuk badakizun bezela;
baina hau saldu beharra daukat,
hil egingo naiz bestela. (bis)
Droga zikinak gogortu dizkit
mamia eta azala;
baina amari..., amari ezpa,
ez da pekatu makala!
Neure burua gorrotatzen dut
hau pentsatzen jarri ahala.
Hemen dut droga zitala
(betiko utzi nazala), (bis)
baina nik ama gaur zin dagizut
noipait utziko dudala;
sinets ezazu nigan, nik zugan
sinesten dudan bezala. (bis)