Bertsos - Ver ficha Más información sobre esta sección
2001-11-24 Azpeitia Txapelketa [Bertsoa] / Jon Maia
| Bertsoa entzun |
2001-11-24 Azpeitia Txapelketa [Bertsoa] / Jon Maia
Nombre de la estrofa:
Hamaseiko berdina, 8 puntuz eta 8 silabaz (hg) / Zortzi puntuko berdina, 16 silabaz (ip)
Localización:
XDZ - Xenpelar Dokumentazio Zentroa
Umeai halako baten
makurtu zaio lepoa,
aurpegi ederra dauka
lasaia eta bapoa.
Benetan ipuin luzea
atera zaigu gaurkoa,
baina pozik egiten det
eguneroko jokoa.
Telebista piztu det ta
honekin ez da nahikoa,
albiste hori entzun dut
ta erori zait malkoa,
baina ezin dut sinistu
oraintxe entzundakoa,
hori bai dela ipuin bat,
baina lo ez egitekoa!
Albisteetatik datoz
izugarrizko bildumak,
ze gauza jasotzen ditun
kazetariaren lumak!
Ia ez ditut sinisten
telebistatik entzunak,
azokan umeak saltzen,
hoiek bai kontu ilunak!
Horrelakoen aurrean
sobran daude erantzunak,
hainbeste guraso dira
gaiztoak bezain lizunak;
ez zaizkigu ahaztu behar
era hontako jardunak,
helduen miserietan
haurrak ez dira errudunak.
Horrelakoetan gaizki
sentitu ohi da norbera,
hori nola ez den inoiz
inor tratatzeko era.
Ume txikiak ze erru
izan dezake gainera?
Guraso hori izana
txikitxoaren kaltera.
Zoramenean dijoa
mundu txar honen karrera,
ume bat saldu nahirikan
bete nahi zuen kartera.
Sofatik jaiki naiz eta
egongelatik atera;
banoa nere umeai
musutxo bat ematera.