Bertsos - Ver ficha Más información sobre esta sección
2001-11-25 Hendaia Txapelketa [Bertsoa] / Maialen Lujanbio, Aitor Sarriegi
| Bertsoa entzun |
2001-11-25 Hendaia Txapelketa [Bertsoa] / Maialen Lujanbio, Aitor Sarriegi
Nombre de la estrofa:
Zortziko handia (hg) / Lau puntuko handia (ip)
Localización:
XDZ - Xenpelar Dokumentazio Zentroa
Sarriegi:
Zu betidanik izanagatik
zure bizitzaren jabe,
etxe berean bizi gara gaur,
egunero parez pare;
ta horregatik eskatzen dizut
ez zazula egin alde,
famili hau ez baita osoa
gure ondoan ez bazaude. (bis)
Lujanbio:
Bizpahiru urte aita hil zela
ta orain naiz alarguna.
Etxekoandre gisan daukazu
etxean ama kuttuna;
lurra nahi duzu dizdiratsua,
erropa dena txukuna...
Aitor maitea, horixe da zuk
nahi duzun osotasuna. (bis)
Sarriegi:
Nik onartzen det nere arropak
sarri dituzula pranta,
baina hitz eginda konpon liteke,
txorakeriak lagata;
mundu hontako zure ibilera
betiko ere ez da-ta,
ez det nahi haurrek antzematerik
beren amonaren falta. (bis)
Lujanbio:
"Ez joateko, ez joateko",
geratzea nahi zenduke;
haurren aurrean itxura eginez
badezu nahiko bertute.
Zure semea eta alaba
motzak diranik ez uste,
etxea hautsez betetakoan
ondo antzemango dute! (bis)
Sarriegi:
Zure iritziz atera nahian
nabil nahi aina etekin,
baina lehen ere esan dizut ta
ados ez nago horrekin,
umeek bizi nahi dutelako
beraien amonarekin;
neskame bat har dezagun, baina
gelditu zaitez gurekin. (bis)
Lujanbio:
Zure andreak eta zuk, biok,
horrenbeste buruhauste!
beti lanean, beti lepo ta
etxea erdi biluzte.
Zure semeak eta alabak
neskame bat euren truke;
eurek ez dute neskamerik nahi,
gurasoak nahi dituzte. (bis)