Bertsos - Voir fiche Pour savoir plus sur cette section
2016-11-12 Baiona Txapelketa [Bertsoa] / Miren Artetxe, Odei Barroso
| Bertsoa entzun |
2016-11-12 Baiona Txapelketa [Bertsoa] / Miren Artetxe, Odei Barroso
Nom de la strophe:
Zortziko handia (hg) / Lau puntuko handia (ip)
Localisation:
XDZ - Xenpelar Dokumentazio Zentroa
Odei :
Hala agindu digute eta
hasi behar barra husten
zail egiten zait gu nola hasi
elikagaiak zapuzten ?
Nere etxean horrelakorik
ez zidaten erakusten
nagusiak hala erran du baina
kontzientziak ez dit uzten. (bis)
Miren :
Haiena ez den jana botatzen
proletarioen klasea
nik ere ez dut ongi ikusten
pintxo hauek botatzea
batzuk etxean haurrak nigarrez
besteek sabela asea
batzuk jateko ezer ere ez ta
besteek diru gosea. (bis)
Odei:
Diru goseak eragina du
munduan zehar nekea
ostatu hau da gure lantoki,
soldataren aterpea
guztia bota behar omen dugu
bat bera ez da merkea
batzuk sabela hutsa dute ta
guk zakarrontzi betea. (bis)
Miren :
Pintxo guztiak botatzea da
hemen guztion kaltean
baina ideia bat bururatu zait
pentsatuaz bapatean
abisatzeko afitxatxo bat
jarri dezagun atean
ta bihar goizez bana ditzagun
behar dutenen artean. (bis)
Odei :
Behar duteneri banatzea da
eginbide on jatorra
gure nagusi jauna ez alda
batzuetan egoskorra
ideia ona iruditzen zait
neri afitxarena horra
bihotz biguna dutenentzako
daukagu ogi gogora. (bis)
Miren :
Nahiz inguruan izango diren
hainbat egoera grabe
ni neuk nirea onartzeko ere
ez naiz izango herabe
"smic"a kobratuz Odei zu ta ni
ere soberan ez gaude
hartu ditzagun batzuk guretzat
hipokritak izan gabe. (bis)