Bertsoak - Fitxa ikusi Atal honi buruz gehiago jakiteko
2006-02-04 Zestoa Lagun-artekoa [Bertsoa] / Andoni Egaña, Sebastian Lizaso
| Bertsoa entzun |
2006-02-04 Zestoa Lagun-artekoa [Bertsoa] / Andoni Egaña, Sebastian Lizaso
Neurria:
Hamarreko handia (hg) / Bost puntuko handia (ip)
Kokapena:
XDZ - Xenpelar Dokumentazio Zentroa
S. Lizaso: Hasi gaitezen berriz kantari
alperrik gaude bestela.
Aitortu behar bertso giroa
hemen hutsala ez dela;
ahal baldin bada igo nahi degu
lehengo saioan nibela;
gogoan izan Manuel zaharran
jaioterrian gaudela;
saia gaitezen bera aurrean
baldin balego bezela. (bis)
A. Egaña: Pixka batean zai egona naiz
erantzunik ba ote dan;
ez degu eta geuk segitzea
mesede degu aukeran.
Mingaina errez dijoa orain
ta ideak erdi hegan;
leheno totelka hasiagatik
oraintxe gaude primeran;
gu iluntzean argitzen gera
Manuel zaharraren eran. (bis)
S. Lizaso: Hainbat urtean herririk herri
bertsolari zerbitzala;
haren bertsoek sarri askotan
argitzen zuten itzala.
Gure artizar beti izan da
gabiltzala gabiltzala.
Ez dago hemen baina gogoan
alde batera normala;
nun dan ez dakit dagon tokian
gurekin goza dezala. (bis)
A. Egaña: Seguru nago gozatuko du
bertsoa zun begi-nini;
bertsotatikan abiatuta
sortuaz zenbait harmoni.
Azken txapelak Uztapideren
izena modan ipini;
bat baino gehiok galdetu ohi dit
Uztapide zer, Andoni?
Konparaketa entzute hutsaz
lotsatu egiten naiz ni. (bis)
S. Lizaso: Hemen bakoitzak ahal duen arte
egiten du historia.
Joan zan baina hark zuen fama
ez dago ez eroria;
haren ordezko zein izango ta
Andoni hauxe dotoria.
Txapelen mailan zuk hautsi dezu
hark zuen kategoria;
zuk autopista bihurtu dezu
hark egin zuen bidia. (bis)
A. Egaña: Baina Sebastian pentsatze hutsaz
zer-nolako hotzikara!
Konparaketan hasi al zera
kazetarien gisara?
Manuel manta izan zitekeen
ni gehienera izara;
zuk hartutako konparaketa
ez det albora nahi laga:
autopistarik ez da egiten
biderik ez baldin bada. (bis)
S. Lizaso: Aitortzen degu Manuel zaharrak
zitula hainbeste dohai;
bertsolaritza berpizteko ere
bera nola izan zen gai.
Errespetoa ta miresmena
guk badizkiou Zestoai
eta beste bi aitona ere
ez nituzke ahaztu nahi:
nere aitona hemengoa zen
Andonirena ere bai. (bis)
A. Egaña: Eta lekuko izan liteke
gure abizenen hotsa:
hemen Lizaso bertakoa da
Egaña ez da arrotza;
gure bertsoak beraz Zestoan
izan zun bere jaiotza.
Segi bagenu gure aitonen
ofizioen morrontza
zuk txistulari behar zenuke
eta nik berriz arotza. (bis)
S. Lizaso: Gorputz txikiko aitona omen
burua ez zuen arina;
festa giroa han-hemen sortzen
egite omen ahalegina;
erromeria erromeik eza
ez baita gauza berdina;
txistua eta danbolinakin
abila omen zen baina
eskerrak berak ondo jo zuen
amonaren danbolina.(bis)
A. Egaña: Ai pieza hori joko zuen ba
redoble ta guzti zuzen;
zuen aitonak festetarako
izango zuen hainbat sen;
hazia berak ipini baina
famili baten almazen...
Zalantzatxo bat sortu didazu
galdetuko dizut ozen:
aitona horren txikia bazan
raza noiz mejoratu zen? (bis)
S. Lizaso: Hazi txikiak baratza ona
ez du izaten kaltera;
Txillarramendin bilatu omen zun
hazi jartzeko aukera
eta geroztik arraza behintzat
ez da joan goitik behera;
beste bat degu nere buruan
darabilkiten galdera:
aita hemengoa ama gertukoa
seme rusoa* atera. (bis)
A. Egaña: Generazio ona izango zen
lehenbiziko txandakua
Txillarramendin haize freskoak
pixkat erasandakua;
aitona zendun langile fina
hala da esandakua;
aita're gizon langilea bai
gutxitan etzandakua
eta zu berriz umetatikan
nahi aina izandakua. (bis)
Datu-base honetan eskainitako informazioari buruz jakiteko, kontsultatu lege oharra