BDB Bertsolaritzaren datu-basea

Informazio orokorra

Kategoria

Bat-batekoa

Saioa

2001-12-25 Larrabetzu Jaialdia

Gai-emailea

Gaztelumendi, Patxi

Bertsolariak / Egileak

Egaña, Andoni

Lujanbio, Maialen

Lana

Binaka gaia-emanda

Jarritako gaia

Aita-alabak zaree: aite Andoni, alaba Maialen; ta gainea badakigu Maialen aspaldian ibiltari samar dabilela batetik eta bestera, eta gai honetan be horrela suertatu da: Maialen ikasketak egitera atzerrira joan da, eta orain Gabonak datozela-ta ba etxera bueltatzeko-ta aita joan jako bila aireportura, eta aitak espero zauen Maialenek "aita!" edo esatea, baina antza denez, Maialenek dakarren txikiak "aitita" esan du.

Deskribapena

Doinua

Kontzientzia izaten degu

Neurria / Estrofaren izena

Zortziko handia (hg) / Lau puntuko handia (ip)

Kokapena

Kokapena

XDZ - Xenpelar Dokumentazio Zentroa

Bilduma / Funtsa / Proiektua

Bapatean Bilduma

2001-12-25 Larrabetzu Jaialdia [Bertsoa] / Andoni Egaña, Maialen Lujanbio

Neurria:  Zortziko handia (hg) / Lau puntuko handia (ip) 
Kokapena:  XDZ - Xenpelar Dokumentazio Zentroa 

---

Lujanbio:
Aspaldiko aita, zer moduz zaude?
Itxuraz ederki behintzat.
Ustekabeko izan dira bai
nere ikasketen emaitzak.
Andoni jarri diot izena
nere aita hartuta aintzat;
Olentzeroak ekarri digu
neretzat eta zuretzat.

Egaña:
Olentzeroa ikazkina den
jakin gura nuke behintzat.
Ederki asko astindu'ituzu
Europa aldeko ertzak!
Bejondeizula, bete dituzu
aitita honen ametsak:
ikasketak zuk egin dituzu
ta tituloa neretzat!

Lujanbio:
Bizitzak berak ipini zidan
azterketa bat sakona,
ta hona nere nota bikaina:
haurtxo malko dariona.
Albiste hori jaso nunean
aita ez zen izan broma!
Hasera baten ze atsekabea
ta orain ze zoriona!

Egaña:
Zure umea ekarri dezu
ta ez daukagu uzterik;
ene alaba ez zaite egon
zalantzan edo tristerik.
Ez zazu espero hemen erritan
edota bronkan hasterik,
atsekabeak ez baitit iraun
segundu erdi bat besterik.

Lujanbio:
Urte ta erdi-edo daramat
Londres haundian barrena;
Bilbora itzuli naiz eta hau da
bizi honek dakarrena;
ta badakizu aita ze ohi dan
horrelakoetan pena:
zuk ez zenekin ezertxo baina
amak bazekien dena.

Egaña:
Hauxe sorpresa, hau ezustea
alabak orain esana!
Nere biloba onartuko dut
eta horixe da dana.
Bihar kotxean harro hartuta
joango naiz lagunengana,
ta ia noizbait konpontzen dudan
amakiko harremana!

Lujanbio:
Emozionatu egin da aitona
ia ito du negarrak!
Bera ikusi eta ni ere
erabat jan nau dardarrak.
Londres haundi da gu biok txiki
ta gaude triste samarrak.
Kantaizkiozu guri kantatzen
zenizkigun bertso zaharrak.

Egaña:
Kantatuko'itut sehaska ondoan
hamaika bertso atsegin,
lehenago zuri kantatuak ta
orain bilobari berdin.
Igual Markesan alabarenak
hirurogei bertsorekin,
nere biloba gure etxean
luzaroan gera dadin.