BDB Bertsolaritzaren datu-basea

Informazio orokorra

Kategoria

Bat-batekoa

Saioa

2002-07-06 Usurbil Jaialdia

Gai-emailea

Izeta, Joxe Mari

Bertsolariak / Egileak

Egaña, Andoni

Irazu Muñoa, Jexux Mari

Lana

Binaka gaia-emanda

Jarritako gaia

Jexux, zu hamalau urteko mutil koskorra zaitugu. Andoni, berriz, zure ama. Gaur etxera joan zara, atea zabaldu eta edanda aurkitu duzu salan, eta hauxe esan dizu: " Ez esan ezer aitari".

Deskribapena

Doinua

Ludi bizitza abesti gozoz

Neurria / Estrofaren izena

Zortziko handia (hg) / Lau puntuko handia (ip)

Kokapena

Kokapena

XDZ - Xenpelar Dokumentazio Zentroa

Bilduma / Funtsa / Proiektua

Bapatean Bilduma

2002-07-06 Usurbil Jaialdia [Bertsoa] / Andoni Egaña, Jexux Mari Irazu Muñoa

Neurria:  Zortziko handia (hg) / Lau puntuko handia (ip) 
Kokapena:  XDZ - Xenpelar Dokumentazio Zentroa 

---

Irazu:
Jaio ezkeroz ama zugandik
zenbat laztan, zenbat muxu!
Etxera sartu eta odola
izoztu egin zait aizu.
Botila eskuan, zure barruan
samin haundin bat badezu.
Aitari ez diot ezer esango
baina kontatu zaidazu.

Egaña:
Honen arrazoi izan liteke
nere betondo ubela;
atzo gauean sentitu nuen
matrailekoa bestela.
Aitari arren ez esan ezer
eskatu dudan bezela.
Seguru nago jakiten badu
berriro joko nauela.

Irazu:
Aitak kolpeka hartu zaitu ta
negarrez zaude orduan.
Ez nuen uste halakorikan
neukanikan inguruan.
Lasai ez diot ezer esango
eramango det barruan
baina zeoze azalduko'iot
entenditzeko moduan.

Egaña:
Baina esatea izan liteke
semea gu bion kaltez:
ni neu eskuaz jotzen nau eta
zu igual ondoren katez.
Begira nere lepo ondoa
semea kontura zaitez:
lehen alkohol batez sendatzen nitun
eta orain beste batez.

Irazu:
Lehen alkohol bat ta orain bestea
hartzen baitzaitu kolpeka.
Triste zaude zu negar eginez
atsekabean beteta
ta ez diozu ezer esan nahi
zergatik ez hartu beta?
Zer konponbide ikusten dezu
dena zuretzat gordeta?

Egaña:
Garai batean aitanganako
banuen borondatea.
Bere kolpeek ipini naute
gorroto gaiztoz betea.
Zuk nahi badezu etor zintezke
nere semetxo maitea;
nik irtenbide bakarra daukat:
etxetik alde egitea.

Irazu:
Baina horrekin urratzen dezu
semearen interesa:
familia hautsi ta ni bakarrik
panorama aldrebesa.
Ama ekatzu botila hori
aitarenganako presa;
muturretikan edan dezala
trago txar hori har beza!

Egaña:
Zure aitatxok nere bihotza
egin du hainbat pusketa.
Ezin det jasan jenio hura
ezin det jasan kasketa!
Ene semea buka dezagun
gu bion elkarrizketa
eta mesedez hor dago atea
jarri zaiozu krisketa!