Bertsoak - Fitxa ikusi Atal honi buruz gehiago jakiteko
2002-12-21 Getxo Jaialdia [Bertsoa] / Andoni Egaña, Maialen Lujanbio
| Bertsoa entzun |
2002-12-21 Getxo Jaialdia [Bertsoa] / Andoni Egaña, Maialen Lujanbio
Neurria:
Zortziko handia (hg) / Lau puntuko handia (ip)
Kokapena:
XDZ - Xenpelar Dokumentazio Zentroa
Lujanbio:
Astean bitan bukatzen degu
gu biok xixko eginda
ta gainontzeko bost egunetan
buruari eraginda.
Lehen gaztetan jartzen genion
gauero-gauero ginda.
Denborarekin normaltasuna
ere zimurtu egin da!
Egaña:
Garai batean genitularik
hogei-hogeita bost urte
orduan bai gu saiatzen ginan
oso sarri oso fuerte
zalantzan nago bataz besteko
hori ezin degun bete
nere ustetan enkuestatuek
gezurra esaten dute.
Lujanbio:
Gezurra edo egia ote dan
da norberaren auzia
gure logelan nabaritu da
behintzat sukar gabezia.
Lehen gabero genuen festa
ta normala zen guztia
orain gutxitan egiten degu
gutxi hori berezia.
Egaña:
Berezitasun hortaz mintzatuz
emazte bejondeizula!
Kalidadeak zer balio dun
ezin liteke kalkula!
Garai batean kantidadea
ere genuen mardula...
Ni zuregatik, zu neregatik
ez gera hasten sekula.
Lujanbio:
Andonik ditu mila aitzaki
ta neronek ere berdin
ez dakit ondo guk ez dugun nahi
edo eta nahi ta ezin.
Alde txar orok ze alde on dun
askotan ezin da jakin:
irudimenak irabazi du
sasoia galtzearekin.
Egaña:
Hitz jolasekin leheno gogoa
ta orain berriz goguan.
Gustora gaude degunarekin
ze ajola du orduan?
Bataz bestera iristen gera
lehen esan dedan moduan
enkuestatua izan nintzan ta
nik zortzi erantzun nuan.
Lujanbio:
Beti izan da esajeratu
xamarra gizon hau, tira!
Kalkulo fin bat egite aldera
zatitu behar da erdira.
Orain lehengoa ez det sentitzen
Andoni zuri begira
zure gorputza nere begiak
batera zahartu dira.
Egaña:
Biak batera joaten dira
ziria ta atabala
gaia entzunda berpiztu gera
hauxe sorpresa, aibala!
Orain edonork pentsa dezake
ohera joango gerala
buruko minez nago ordea
alda dezagun kanala.
Datu-base honetan eskainitako informazioari buruz jakiteko, kontsultatu lege oharra