BDB Bertsolaritzaren datu-basea

Informazio orokorra

Kategoria

Bat-batekoa

Saioa

1998-01-06 Lasarte-Oria Jaialdia

Gai-jartzailea

Urkia, Larraitz

Bertsolariak / Egileak

Iturriaga, Unai

Lujanbio, Maialen

Lana

Binaka gaia-emanda

Jarritako gaia

Bertsozale Elkartea zuzpertzearren zera proposatu dio Maialenek Unairi: jokatu berri den Euskal Herriko Bertsolari Txapelketan finalista izan ziren zazpi gizonezkoekin striptease bat antolatzea.

Deskribapena

Doinua

Andre Madalen andre Madalen

Neurria / Estrofaren izena

Zortziko handia (hg) / Lau puntuko handia (ip)

Edukiari buruz

Entitateak

Euskal Herriko Bertsozale Elkartea

Aldizkako Ekitaldiak

Bertsolari Txapelketa Nagusia (12. 1997)

Kokapena

Kokapena

XDZ - Xenpelar Dokumentazio Zentroa

Bilduma / Funtsa / Proiektua

Bapatean Bilduma

1998-01-06 Lasarte-Oria Jaialdia [Bertsoa] / Unai Iturriaga, Maialen Lujanbio

Neurria:  Zortziko handia (hg) / Lau puntuko handia (ip) 
Kokapena:  XDZ - Xenpelar Dokumentazio Zentroa 

---

Lujanbio:
Gure elkartea nola ez dagon
itxura onegikoa,
hamaika traba baditu eta
ez degu diru nahikoa.
Beira nolako planta daukagun,
beira nolako tipoa!
Egin dezagun guk Full Montyren
bertsio folklorikoa.

Iturriaga:
Belodromoko zortzikotea
etorri zaizu gogora,
nere sex-appeal guztia behintzat
aspaldi joan zan zerora.
Gure estandarte ta lantza punta
oraingoan Lizaso da,
bi aukera daude: edo aberastu
edo bestela zulora.

Lujanbio:
Beraz Lizaso klaket dantzatuz
azalduko da aurrena;
Irazu eta Jon Maia ere
dantza sensualez hurrena;
puntu ona da zure praketa,
nere eskotearena,
ta txapeldunak erakuts beza
burua ez beste dena.

Iturriaga:
Nahiz ta batzuei igual ideia
suertatu nahiko arraro,
diru biltzeko ona da eta
ni gutxinez ados nago.
Zeuk esan duzu hor txapelduna
bera da nagusi, klaro!
Ia gorputza izaten duen
hortzak baino ederrago.

Lujanbio:
Gu hementxetik hasiak gaude
berari adarra juaz,
ta dantzarako balioko du
Andoniren talentuaz;
pentsa ezazu Irazu eta
Jon Maia malla estuaz,
tabladu erdian estu dantzatzen
habanera kantatuaz.

Iturriaga:
Zenbat idea nere burutik,
badaukat bai irriparrik!
Ta irriparre bertikala da
ez dago esan beharrik;
Maia atzean ta zu erdian
Irazu aurrean jarririk,
ménage à trois bat eingo dugu
ausartenentzat bakarrik.

Lujanbio:
Ni prestu nago, pasa nahi nuke
horrelako zenbait trago,
behingoagatik juan gaitezen
bertsotatik haratago.
Jende morboso guzti hau ere
gure eskeintzan zai dago,
baietz begiak hauek eduki
gaur baino irikiago!

Iturriaga:
Beste ideia bat bota behar dut
jadanik berotu nahiz ta;
ziur jenteak esango dula
"nahikoa, nahikoa, basta!".
Baina amaitu ordurako dut
beste sorpresa bat presta:
kantzontzilo ta kuleroekin
egingo dugu subasta.