Bertsoak - Fitxa ikusi Atal honi buruz gehiago jakiteko
1996-02-10 Zegama Jaialdia [Bertsoa] / Estitxu Arozena, Aitor Mendiluze
Bertsoa entzun |
1996-02-10 Zegama Jaialdia [Bertsoa] / Estitxu Arozena, Aitor Mendiluze
Neurria:
Zortziko handia (hg) / Lau puntuko handia (ip)
Kokapena:
XDZ - Xenpelar Dokumentazio Zentroa
Mendiluze:
Egañak zion maitemintzea
bizilegea izanik,
neronek ere hau probatzeko
eduki nuen kemenik.
Eta nahiz jakin poz gehiegirik
ez dizudala eman nik,
orain artean ez nuan uste
horrenbesterako zanik. (bis)
E.Arozena:
Nere ustetan erabakia
hartzeko eskubidea dut;
zuk diozunez horrenbesteko
bidea egin dugu guk.
Egaña ere aipatu duzu,
eman dizkit pista batzuk;
ziurtasuna berezkoa dut
ta askatasuna nahi dut. (bis)
Mendiluze:
Askatasuna behar dezula,
zertarako? Ze arraio!
Segurtasuna aurrerantzean
ez al zenduke zuk nahio?
Neska zer dan-da famatu nahian
egin duzu hainbat saio,
gauz onak asko lituzke baina
zerbait faltatuko zaio. (bis)
E.Arozena:
Berriro ere gai berdinakin,
besteik ez nuen espero.
Nola edo hala pasa ditugu
pare bat urte han bero.
Neska batekin noala orain
ta ez zaitez jarri ero.
Zein den onena esango dizut
biak probatu ta gero. (bis)
Mendiluze:
Mina hartzen det nere ondotik
neskarengana joatean;
biak probatu nahi dituzula
diozu aho betean,
bainan ondoren damutuz gero
zerorrentzako kaltean.
Beti zure zai izango nauzu
datorren astebetean. (bis)
E.Arozena:
Badakit zaila dela denentzat
holakoak ulertzea:
neskak-neskekin edo mutilak
mutilekin ibiltzea.
Baina halare ez zait iruitzen
horrenbesteko trantzea,
zuri gustatu izan zaizuna
neri ere gustatzea. (bis)
Datu-base honetan eskainitako informazioari buruz jakiteko, kontsultatu lege oharra