Bertsoak - Fitxa ikusi   Atal honi buruz gehiago jakiteko

2020-01-18 Aramaio Plaza librea [Bertsoa] / Andoni Egaña, Oihana Iguaran, Ane Zuazubiskar Iñarra

Bertsoa entzun  

Informazio orokorra

Kategoria
Bat-batekoa
Aldizkako Ekitaldia
Bertso Eguna (51. 2020. Aramaio)
Saioa
2020-01-18 Aramaio Plaza librea
Gai-jartzailea
Ugarte, Marta
Bertsolariak / Egileak
Egaña, Andoni
Iguaran, Oihana
Zuazubiskar Iñarra, Ane
Lana
Hirunaka gaia-emanda
Jarritako gaia
Zuek hirurok koinatuak zarete. Eta gaur lehenengo aldiz Aramaiora etorri zarete, bainuetxera, eta hortxe zaudete baineraren aurrean. Andoni, bainujantzi estu-estu batekin, slip horietako bat; Oihana, zu, neoprenoarekin etorri zara, eta zu, Ane biluzik.

Deskribapena

Doinua
Antton eta Maria I
Neurria / Estrofaren izena
Hamarreko txikia (hg) / Bost puntuko txikia (ip)
Bertso kopurua
9

Kokapena

Kokapena
XDZ - Xenpelar Dokumentazio Zentroa
Bilduma / Funtsa / Proiektua
Bapatean Bilduma

2020-01-18 Aramaio Plaza librea [Bertsoa] / Andoni Egaña, Oihana Iguaran, Ane Zuazubiskar Iñarra

Neurria:  Hamarreko txikia (hg) / Bost puntuko txikia (ip) 
Kokapena:  XDZ - Xenpelar Dokumentazio Zentroa 


O. Iguaran
Balneariorantza
hasita ausartzen
horren txikia zenik
ez ginan ohartzen
biluztasuna berez
nahiz degun onartzen
zure slip asuntoa
ez det ondo hartzen
ta uste det hirurok
ez gerala sartzen. (bis)

A. Egaña
Ze koinata majak ta
ze koinata pare
bainera bilakatu
zait ia altare
egin det aitaren ta
hiru miserere
pittin bat tapatzeko
egizu mesede
ni ja ez naiz kabitzen
nire baitan ere. (bis)

A. Zuazubiskar
Nahiz ta mundura jaio
haragi igualez
neopreno, slipez
eta ni azalez
Aramaio bete da
ur beroen zalez
asko sinesten dut nik
izarrez, seinalez
bat ikusi nahi nuke
bestea igual ez. (bis)

O. Iguaran
Hiru estilootan
a ze panorama!
Bizente Goikoetxea
zutituta dana
pentsa ze bainuetxe
herriak daukana
aterki, iturri ta
guztiak ai ama!
Ta urezkoa al da
hango tobogana? (bis)

A. Egaña
Hori alperrik dala
nago sinetsita
aitaren baten igo
ta ezin jetsi ta
horrelaxe nabil ni
erabat etsita
hobe det aurpegia
eskuaz itxita
baina behatz tartean
tarte bat utzita. (bis)

A. Zuazubiskar
Zirrikitua utziz
auskalo norako
ados gogotsu nago
ni txirristarako
baina herri honetan
jaten denez bapo
plana utzi dezagun
bazkal osterako
hortzak behar ditugu
bazkaritarako. (bis)
O. Iguaran
Ur sulfurosoena
egin zuten promes
oso onak omen dira
edatean onez
ta probatu edo ez
behin hemen gaudenez
hau ezin kabituta
lehendikan dagonez
probatu ikusteko
guk edan edo ez. (bis)

A. Egaña
Balnearioan gero
zer nolako festa!
Ekarri omen dute
kristoren orkestra
ta ura probatzeak
sortzen didan kezka!
Ezezkoa emanda
banoa iheska
sulfuroso edo ez
ur onikan ez da. (bis)

A. Zuazubiskar
Ez dugu ba edango
egin dezan kalte
plan ederra zen eta
hartu dugu parte
baina hemen ze aterki
hemen ze ur parke
zuek biok utzita
baineran aparte
pizteko zain gelditu
nahi dut uda arte. (bis)

Datu-base honetan eskainitako informazioari buruz jakiteko, kontsultatu lege oharra