BDB Bertsolaritzaren datu-basea

Informazio orokorra

Kategoria

Bat-batekoa

Saioa

2008-04-06 Zegama Jaialdia

Gai-emailea

Zaldua, Ion

Bertsolariak / Egileak

Egaña, Andoni

Gaztelumendi, Beñat

Mendiluze, Aitor

Sarriegi, Aitor

Lana

Launaka gaia-emanda

Jarritako gaia

Memoria eginez, gogoratuko gara Txapelketa Nagusiaren finalean, BECen, ia hamalau mila entzule izan zirela. Gipuzkoako finalean, Illunben, ia bederatzi mila. Atzo jokatu zen Arabako finala, eta sekula baino jende gehiago izan zen: ia seiehun lagun.

Deskribapena

Doinua

Nere gogoa hegan dijoa

Neurria / Estrofaren izena

Zortziko handia (hg) / Lau puntuko handia (ip)

Kokapena

Kokapena

XDZ - Xenpelar Dokumentazio Zentroa

Bilduma / Funtsa / Proiektua

Bapatean Bilduma

2008-04-06 Zegama Jaialdia [Bertsoa] / Andoni Egaña, Beñat Gaztelumendi, Aitor Mendiluze, Aitor Sarriegi

Neurria:  Zortziko handia (hg) / Lau puntuko handia (ip) 
Kokapena:  XDZ - Xenpelar Dokumentazio Zentroa 

---

A. Mendiluze: Hamalau mila baziren BECen
final denetan nagusi
Illunben ia beatzi mila
ez zun ematen itsusi
Araban seirehun eta halere
lehen zeuzkaten markak hautsi
baina ez geratu zenbakietan
proportzioak ikusi.

A. Egaña: BEC ta Illunbeko kopuru hori
kopuru haundi-itzela
Arabak ere eskeinia du
rekor omen dan nibela
baina uste det Arabakoa
aukeran gutxitxo dela
oraindik ere sakona baita
San Adriango tunela.

B. Gaztelumendi:Tunela ez baino plazak aspaldi
ondo ditut ezagutu.
Imajinatu bertsolari bat
ta mila entzule mutu
batek bertsoa bukatu eta
frontoia txalotan urtu?
Bertsolaritza ezin delako
zenbaki bidez neurtu.

A. Sarriegi: Esaten dute Gipuzkoa dala
bertsolarien sehaska
eta Araban zazpirehun lagun
ta guk buruari hazka.
Beñatek argi asko esan du
beraz datuekin basta!
Zenbakietan ezin da neurtu
saio baten arraskata.

A. Mendiluze: Izatez ere irudimena
joaten zaigu urrutira
realidadea ez ikusteko
sarri bidea hori da.
Hemen gabiltza zenbat euskaldun
bertsozale den begira
han bertsozale ta euskaldunak
biak sortu behar dira.

A. Egaña: Kopuruetaz hitz egiteko
aukera orain heldu da.
Bertsolaritzak soil-soilik dauka
gure hizkuntzaren muga.
Hazi ta hazi komeni al den
nik'e badet nahiko duda
sarritan lehertu egiten baita
gehiegi puzten den hura.

B. Gaztelumendi: Baino Araban puzten ari da
eta horrek zer du txarrik?
BECen hamahiru mila baziren
ez dago esan beharrik.
Illunben ere zortzi milatik
geunden pasatu samarrik
baino zergatik goatzen gera
txapelketekin bakarrik?

A. Sarriegi: Urtean zehar hainbat herritan
egiten degu pasara
ta badakigu zenbat pertsona
etortzen diren plazara.
Nahiz ametsetan gezur haundiak
sinistu gure kasara
Illunbe ere ez da egia
egia gaurko plaza da.