Bertsoak - Fitxa ikusi Atal honi buruz gehiago jakiteko
1999-11-27 Donostia Jaialdia [Bertsoa] / Ainhoa Agirreazaldegi, Anjel Mari Peñagarikano
Bertsoa entzun |
1999-11-27 Donostia Jaialdia [Bertsoa] / Ainhoa Agirreazaldegi, Anjel Mari Peñagarikano
Neurria:
Hamarreko txikia (hg) / Bost puntuko txikia (ip)
Kokapena:
XDZ - Xenpelar Dokumentazio Zentroa
Peñagarikano:
Nere ingurutatik
nik zenbat atake,
beti ni zirikatzen
dabiltza jo ta ke!
Aurtengo udazkenean
umilatu naute;
nik bizitzeko pozik
ia ez det bate,
Gipuzkoan "kobarde"
deitzen baitidate. (bis)
Agirreazaldegi:
Lagun-usteengatik
hainbeste zartako,
zu zirikatu nahian
ibili da pranko.
Nik, pentsatzen jarrita,
uste dut zertako:
zure faltan guztiak
hain dabiltza bapo,
Gipuzkun ondo daude
zu ez zaudelako. (bis)
Peñagarikano:
Nunahi egiten al det
hainbat enbarazu?
Zure lore horrekin
puxkat poztu nauzu
eta berriro ere
ni poztu nazazu;
aspaldin poztasunez
ni hain nabil antzu,
ilobak esaten dit
"ze zaharra zeran zu". (bis)
Agirreazaldegi:
Iloba jaio zala
hainbeste denbora,
hau ere ikastolan
ona izango da;
esan dizun horixe
izan duzu froga.
Daukazun ilobakin
zaudela gustora,
oso argia baita
daukazun iloba. (bis)
Peñagarikano:
Hau bai ez dala broma,
hau ez degu txantxa,
bihotz barnean daukat
halako arantza!
Nere atzekaldean
hortxe daukat mantxa,
Ainhoak poztutzeko
badet esperantza;
diote daukadala
nik Bilintxen antza. (bis)
Agirreazaldegi:
Berriro ere zatoz
lorearen eske;
nik erantzungo dizut
gozo bezin aske:
depresioak jota
zaude bataz beste,
Bilintx zure antzekoa
denikan ez uste,
hura perfilez ez da
zu zeran hainbeste. (bis)
Peñagarikano:
Hau dana gainditzeko
aizu ez naiz kapaz,
ni depresiok jota
egun eta gabaz
ta berdin zait euskeraz
ta berdin erderaz;
haren perfila ere
esan dezu, beraz;
nolaz deitzen didate
"Cyrano Berberaz"(1) (bis)
Agirreazaldegi:
Aitzakia tristeez
hain zaude aseta,
ikusten zaitut oso
barrutik erreta.
Askok egin dizute
itxuraz iseka,
ezizen bakar horri
ez jarri arreta,
ezizen gehiago ere
badituzu eta. (bis)
Peñagarikano:
Zugana etorri naiz
gaur Anoetatik,
isekak bainituen
alde denetatik.
Oain zer ein behar dedan
nik ondo badakit,
oso gustora noa
gaur Donostiatik.
Mila esker bihotzez
piropoengatik. (bis)
Agirreazaldegi:
Nola ikusi zaitudan
gaur triste antzeko,
erabakia hartu dut
nik zu laguntzeko;
lagunak ez baititut
edonoiz saltzeko,
ta oraindik bazaude
noizbaite trantzeko,
berriro deitu lasai
kafe bat hartzeko. (bis)
Datu-base honetan eskainitako informazioari buruz jakiteko, kontsultatu lege oharra