Bertsoak - Fitxa ikusi Atal honi buruz gehiago jakiteko
1996-07-06 Zaldibar Jaialdia [Bertsoa] / Leire Bilbao, Kepa Intxausti, Sebastian Lizaso, Anjel Mari Peñagarikano
| Bertsoa entzun |
1996-07-06 Zaldibar Jaialdia [Bertsoa] / Leire Bilbao, Kepa Intxausti, Sebastian Lizaso, Anjel Mari Peñagarikano
Neurria:
Zortziko handia (hg) / Lau puntuko handia (ip)
Kokapena:
XDZ - Xenpelar Dokumentazio Zentroa
Peñagarikano:
San Ferminetan ez dira alperrik
kontseju eta teori.
Aizazu, Kepa, erdi lo zaude,
sonanbulo eta grogi;
nungoa zaren badaezpada
ez'iozu esan inori
eta Iruñean alda ezazu
daukazun aurpegi hori.
K.Intxausti:
Iruñeara heldu ta bertan
ibiliko naiz gustora;
oin erdi grogi ibili arren
aldatuko dut ganora.
Aurpegiana beste era batez
egingo nuke aproba;
aurpegia berez aldatuten da,
han egotea nahiko da.
Peñagarikano:
Leire bera ere kontseju eske
hor etorri zait albotik;
esperientzia badaukat eta
burura hauxe datorkit:
zuk badakizu nola adarrak
ibiltzen diren gogotik,
entzierroa ikus ezazu,
baina barreraz kanpotik.
L.Bilbao:
Barreraz kanpo egon behar naiz
Peñak dion legez zuzen;
"neskatxa kontuz ibili zaitez"
berak kantatu dit ozen.
Baina nik ondo badakit eta
esango dizut gaur ezen,
adardun eta adargabeko
zezen denak toreatzen.
Peñagarikano:
Kontseju ematen hasi naiz eta
oindik ez dira amaitu.
Sebastianek lan asko dauka
kiloak asko baititu.
Aizu Lizaso, Estafetako
kalen ez zaitez abitu,
edo bestela zezenen batek
jota bertan hilko zaitu.
S.Lizaso:
Entzierroa korritzeko ere
ustez nago indarrean;
batzuk korrika ikusten ditut,
beste batzuek lurrean.
Ni Estafetan zertan ibili
korrikaldi baldarrean?
Arrisku gabe korritu ohi det
telebistaren aurrean.
Datu-base honetan eskainitako informazioari buruz jakiteko, kontsultatu lege oharra