Bertsoak - Fitxa ikusi Atal honi buruz gehiago jakiteko
2007-10-06 Elgeta Txapelketa [Bertsoa] / Nahikari Gabilondo
2007-10-06 Elgeta Txapelketa [Bertsoa] / Nahikari Gabilondo
Neurria:
Hamabiko handia (hg) / Sei puntuko handia (ip)
Kokapena:
XDZ - Xenpelar Dokumentazio Zentroa
Nola ahaztu zainetan sartu
nuen lehenengo dosia!
Besoetako azala badet
ziztada zuloz josia;
zazpi urtean egon ondoren
droga munduan jausia
pentsatu nuen kanpora egin
behar nuela jauzia;
etorkizuna eraikitzeko
eskutan nuen auzia
berriro ere hutsetik hasi
nezakeelako guzia. (bis)
Behin betirako atzean utzi
nere nahi eta ezina;
noizbait erabat ahaztu nahi nuke
nere iragan gordina.
Poliziatzat lanean hasi
ta horra nere etekina
tarteka inork begiratzea
ez zait gustatzen jakina
baina hala're egin behar det
merezi dun ahalegina
orain erabat konpon dezadan
lehenago gaizki egina. (bis)
Egindakoak, bizitakoak
noski ez dauzkat ahaztuta
kontzientziak horretan beti
lanik ematen digu ta;
gaur ere gogoz bete det lana
zintzo hasi eta buka
nahiz ta sarritan egitekoa
nik neuk ezin dedan hauta
zoriontsu naiz gustora nago
hori zertarako uka?
Droga saldu ohi zidan huraxe
nik neuk giltzaperatuta. (bis)
Datu-base honetan eskainitako informazioari buruz jakiteko, kontsultatu lege oharra