1997-12-14 Donostia Txapelketa 11:00 [Bertsoa] / Aritz Lopategi, Mikel Mendizabal

Orain dela hogeita bost urte UEUren sorreran parte hartu zenuten bi irakasle zaituztegu. Zu, Mikel, hogeita bost urte hauetan egin den aurrerapenaz oso gustora zaude, baina Aritz ez dago horren gustora.

Deskribapena

Doinua

Oihan beltzean zoinen eder den

Neurria / Estrofaren izena

Zortziko handia (hg) / Lau puntuko handia (ip)

Edukiari buruz

Entitateak

Udako Euskal Unibertsitatea (UEU)

Kokapena

Kokapena: XDZ - Xenpelar Dokumentazio Zentroa
Bilduma / Funtsa / Proiektua: Txapelketetako Bilduma

1997-12-14 Donostia Txapelketa 11:00 [Bertsoa] / Aritz Lopategi, Mikel Mendizabal

Neurria: Zortziko handia (hg) / Lau puntuko handia (ip)
Kokapena: XDZ - Xenpelar Dokumentazio Zentroa

Mendizabal
Mende laurdenak gure bizitzan
egina du bere jira;
ibilbidea aztertzea ere
une hontan komeni da.
Itxaropentsu jarria nago
geure lorpenei begira:
guztia ez da eskura baina
urrats onak eman dira. (bis)

A.Lopategi
Iruñeako Larraonara
joan ginan biok lehenbizi;
garai haietan euskara gendun
nahiko motel ta itsusi.
Egia esan gaur ere ez naiz
ni oso gustora bizi,
oraindik ere ezin baileike
dena euskaraz ikasi. (bis)

Mendizabal
Irakaslego euskaldunaren
urratsa zabalik dago;
modu hontako aukerarikan
ez gendun izan lehenago.
Nahiz eta alor guztietara
ez den iritsi zeharo,
gure ametsa begiztatzen det
geroz eta gertuago. (bis)

A.Lopategi:
Unibertsital giro horretan
badago ikasle pranko,
halan da guzti hizkuntza aldetik
bizi dira nahiko plako.
Euskeraz zerbait badago baina
halere aitortu beharko:
pauso gutxitxo ez al dira eman
hogeita bost urterako? (bis)

Mendizabal
Hainbat ikaslek aldarrikatuz
egin dute irrintzia;
irakasleen ardura onak
badu bere garrantzia.
Egin ditugun lanei buruzko
ona daukat iritzia,
horri eskerrak berpiztu baita
egungo kontzientzia. (bis)

A.Lopategi
Kontzientzia piztea gendun
aspaldi baten helburu,
baina gaur egun zertan gabiltzan
ez nago oso seguru;
hara, Goiriena gendun hor lehen ta
orain dago Salaburu;
horien eskutan ehun urte barru
guztia euskeraz dugu. (bis)

Mendizabal
Aitortzen dizut alor askotan
oraindik dagon zaputza;
egindakorik ezin da uka,
eman daiogun laguntza;
batzuek goitik ta besteek behetik,
denok bide horri bultza,
ahal dan azkarren lortu dezagun
euskararen normalkuntza. (bis)

A.Lopategi
Dena euskeraz ikasi nahia,
hori gendun geure ames,
baina ikusten da hainbat urtetan
ez dala gertatzen errez;
bide hontatik jarraitu ezkero
diotsut halabeharrez:
guk ez dugu hori ezagutuko
ta gure haurrek ere ez. (bis)

Datu-base honetan eskainitako informazioari buruz jakiteko, kontsultatu lege oharra

BDB Bertsolaritzaren datu-basea

Bertsoak - Fitxa ikusi Atal honi buruz gehiago jakiteko