Bertsos - View details To know more about this section
2008-01-26 Donostia Jaialdia [Bertsoa] / Sustrai Colina
| Bertsoa entzun |
2008-01-26 Donostia Jaialdia [Bertsoa] / Sustrai Colina
Stanza name:
Hamaseiko berdina, 8 puntuz eta 8 silabaz (hg) / Zortzi puntuko berdina, 16 silabaz (ip)
Localization:
XDZ - Xenpelar Dokumentazio Zentroa
Epaileen toga beltza
ta fiskalaren kapela
hemen justiziak ez du
deus kantatzen a capella.
Badaki bere atzean
Gobernu bat dagoela
dena babesten diona
datorrena datorrela.
Frogako laboratorio
Intxaurrondoko kuartela
ta euskaldunarentzako
kartzela beti kartzela.
Espero dut egun baten
konprenituko dutela
kondenen fotokopiez
kokoteraino gaudela.
PPren Gobernuakin
hartu zuten abiada
ta PSOEk eman dio
berebiziko bultzada.
Geroztik hortxe dabiltza
kopiatik kopiara
errudun zein errugabe
euskaldunak kartzelara.
Jadanik pasa zaizkigu
bost edo sei hamarkada
eta ezin da arindu
euren kontzientziko karga.
Auzitegiak aparte
behar genituzke laga.
Herri honen justizia
hemen erabaki behar da.
Madrilen nagusi dira
eskusak ta aitzakiak.
Honaino eraman gaitu
juezaren erabakiak.
Gu ez izan arren jende
beldurti ta kakatiak
beraientzat soilik gara
terroristak, basatiak.
Baina bidea egiten
laguntzen du utopiak
geuk ebatzi behar ditugu
momentuak ta tokiak.
Izango dira eskasak,
ederrak zein egokiak
geure ametsak ditugu
ez beste inoren kopiak.