Bertsos - View details To know more about this section
Hunkitu ninduen bertso sail bati [Bertsoa] / Imanol Lazkano
Hunkitu ninduen bertso sail bati [Bertsoa] / Imanol Lazkano
Stanza name:
Hamaseiko berdina, 8 puntuz eta 8 silabaz (hg) / Zortzi puntuko berdina, 16 silabaz (ip)
Dokumentu-mota:
Hemeroteka (Aldizkari eta Egunkariak)
Argitalpenaren izenburua:
[Aldizkaria] Argitalpen data:
2012-04-22
Localization:
XDZ - Xenpelar Dokumentazio Zentroa
I
Erditu den ama batek
kontatu du abentura,
ezin ahaztu zaio nonbait
pasatako une hura;
bere soina lehertzear da
iztarretan behera ura,
zirraragarria guztiz
kontatu duen modura.
Nahiz eta amarentzako
bilakatzen den tortura,
betitik haurrak horrela
etorri dira mundura;
ez dago beste biderik
horrelaxe da natura,
maiteminaren jolasak
pasatzen duen faktura.
II
Jolasaldi polit hartan
isuritako hazia,
bederatzi hilabetez
erraietara josia;
amagai berri batentzat
egoera berezia
soinean ondoeza ta
patxararen gabezia.
Hau nola aterako da
da galdera nagusia,
gaitzerdi halare ongi
irteten bada guzia;
nahiz eta zoriontzeko
izaten den notizia,
gozamen ta sufrimendu
nahasketa da bizia.
III
Mundura haurrak sortzeko
dagoen bide bakarrak
amari ikusarazi
izan dizkio izarrak.
Hainbeste estutzen baitu
bizitzaren atzaparrak,
galtzen ditu ur ta odol
mailatzen ditu giharrak.
Baina amarengan dauden
neurriz kanpoko indarrak
gainditzen laguntzen dio
pasatako une txarrak;
hain bortizki jaulkitako
malko eta deiadarrak.
Ahaztuerazten dizkio
haurtxoaren irriparrak.
IV
Nerabezaroko dama
polit ta pinpirin hari.
Ilaran badatozkio
garraztasunak ugari.
Hala ere tristurarik
ez zaio inoiz nabari,
maitasun ta ama sena
baititu beti gidari.
Guztiontzat ama dugu
doan jasotako sari,
zutik eutsi ohi diona
sendiko bizi pozari
nahiz eta geronen ama
goraipatzen inoiz ari.
Inork ez daki zenbat zor
dion norberak amari
V
Uxue txalotzen dugu
zuk emaniko pausoa,
zure haurrari isuriz
amarengandik jasoa;
dena ez dezu izango
erreza ta erosoa,
baina borondate onak
gainditzen du arazoa.
Lehengo maitasun ur ttantta
orain denez itsasoa,
beregan jarriko dezu
zure izate osoa.
Ziur izango zerala
ama xamur ta goxoa,
izenez eta izatez
egi-egizko usoa.
VI
Amaren goraipamenak
lehen ere egin dira sarri,
aita ere ez daiteke
senditikan at ezarri;
badakit asko laguntzen
diozuela elkarri,
lan garrantzitsu horretan
bakoitza da osagarri.
Ez ahaztu sendia dela
herriarentzat oinarri,
oraina eta geroa
lotzen dituen lokarri;
haurrak sortzeko makina
martxan duzuenez jarri,
herriak behar ditu-ta
haurtxo gehiago ekarri.