Bertsos - View details To know more about this section
1992-05-02 Orexa Jaialdia [Bertsoa] / Mikel Mendizabal, Jon Sarasua, Jokin Sorozabal
| Bertsoa entzun |
1992-05-02 Orexa Jaialdia [Bertsoa] / Mikel Mendizabal, Jon Sarasua, Jokin Sorozabal
Stanza name:
Zortziko handia (hg) / Lau puntuko handia (ip)
Localization:
XDZ - Xenpelar Dokumentazio Zentroa
Mendizabal:
Egun hauetan Los Angeles-en
bada zerbait berezia,
auzi txar batek eragin baidu
oso giro nahasia,
baztarrak sutu ta pertsonak hil
ondorio itxusia,
justiziaren justizi ezak
sortu du injustizia.
J.Sarasua:
Los Angeles-en beltzek hamaika
sarraski egina dute,
pakerik eza etortzen baita
justizi ezaren truke,
nahiko arrazoi badukate ta
nigatik nahiago nuke,
askatasunan monumentua
jota botako balute.
Sorozabal:
Los Angeles-en hamaika istilu
ari zaizkigu ematen,
dozenerdi bat polizi gaizto
eskarmentatu ditzaten,
ta munduari ari zaizkie
disimuloan esaten,
zuria edo beltza izatea
berdin ez dala izaten.
Mendizabal:
Razismoaren aipamen hori
egin beharko kasuan,
beltzen aurkako represioa
aurrera doa pausuan,
hori dala ta kale guztiak
lehertuta dauzkate suak,
ez dakit noiz baina hori ere
noizbait gerta behar zuan.
J.Sarasua:
Arrazismua zabaldua da
ta garbi nahi nuke esan,
Euskal Herrian inoiz ez dugu
beltzen problemarik jasan,
baina ez gaitezen eskandaliza
hipokrita batzun gisan,
hemen ez zaie ijitoeri
inoiz maitasunik izan.
Mendizabal:
Hori dala ta agintariak
daude kezkati horrela,
Bush jaunak ere hitzegin digu
minberauta dagoela,
egi garbia hauxen da eta
denak jakin dezatela,
egurrarekin makurtzen dana
egurrez altxatzen dela.
J.Sarasua:
Guk Amerika gertu daukagu
jantzian eta kotxean,
erositako produktoetan
telebistan da etxean,
ea ohartzen geran apur bat
istilu hau bukatzean,
ze injustizi ezkutatzen dan
Coca-Cola-ren atzean.
Sorozabal:
Boikota egin nahi al diozu
zuk orain Coca-Cola-ri?
Kalimotxoa edaten inoiz
zu ez ote zera ari?
Azken gauza bat esango diot
Los Angelesekoari:
Los Angeles-en aingeru gutxi
ta deabrua ugari.