Bertsos - View details To know more about this section
2005-11-27 Bera Txapelketa [Bertsoa] / Amets Arzallus, Sustrai Colina
Bertsoa entzun |
2005-11-27 Bera Txapelketa [Bertsoa] / Amets Arzallus, Sustrai Colina
Stanza name:
Zortziko handia (hg) / Lau puntuko handia (ip)
Localization:
XDZ - Xenpelar Dokumentazio Zentroa
A. Arzallus:
Aspaldi jaso zenuen Sustrai
nagusiaren karneta
gonape hortan hazi zinen zu
beti laztan ta fereka
eta ni kaka eginda nago
ate aurrean zer gerta
beti bezela neri botako
didalako errieta.
S. Colina:
Zu zaude lasai eta neregan
hartu ezazula babes
onean eta txarrean beti
batera baikabiltz Amets;
egoera hau konpon liteke
pare bat gezur esanez
akaso lana galduko dugu
gure laguntasuna ez.
A. Arzallus:
Hala ere zure jarrera ez da
laguntasunaren froga;
ataka hontan gauden laugarren
aldia edo izango da.
Atea dugu gure hesia
irudi ta metafora
bai zu barrura joango zara
ni botako nau kanpora.
S. Colina:
Berandu heltzen gu omen gara
bi errege ta bi maisu
baina gaurkoan arraultzak oso
goian ipini zaizkizu;
kontu merkeak ta aitzakiak
esanez gaur ez ari zu
lehen barkatu baldin badizu
berriz barkatuko dizu.
A. Arzallus:
Ni nazkatu naiz burua jeitsi
otzandu eta isiltzen
bakarrik sortzen dira pertsonak
ta bakarrik dira hiltzen.
Nere errua dugu guzti hau
lagun txarrerantz joan nintzen
gaurtik aurrera ikasiko dut
bakar-bakarrik ibiltzen.
S. Colina:
Bakardadean zertan aritu
zeurekoi eta itsusi
bakarrik ezer lortzen duenik
ez dut sekula ikusi.
Geure enpresa monta dezagun
geure talentu ta guzi
ta orduan gu izango gara
langile eta nagusi.