Bertsoak - Fitxa ikusi Atal honi buruz gehiago jakiteko
2007-04-28 Itsasu Jaialdia [Bertsoa] / Sustrai Colina, Unai Iturriaga
2007-04-28 Itsasu Jaialdia [Bertsoa] / Sustrai Colina, Unai Iturriaga
Neurria:
Zortziko txikia (hg) / Lau puntuko txikia (ip)
Kokapena:
XDZ - Xenpelar Dokumentazio Zentroa
S. Colina: Bizi ginela ginen
ausart eta brabo!
Gero beste mundura
halatsu igaro.
Unai joan zaitea
pixkat haratago
zure ezkerreko hanka
nere hilkutxan dago. (bis)
U. Iturriaga: Berriro ere disputan
hasi gara txarto
nere ezkerreko hankak
egin badu salto.
Hezurrak gobernatzen
dut arazo franko
ez zaitut akatuko
hilda zaudelako. (bis)
S. Colina: Kutxan daramazkigu
urteak hiru-lau
ta nere amorruak
lehengo hartan dirau
baina ez naiz kixkaldu
denbora joan arau
zu ondoan eukitzeak
berpiztu egin nau. (bis)
U. Iturriaga: Mehatxua izan da
eta beraz kasu!
Jesukristo bezala
piztu zara aizu
tente jartzeko ere
kapaza zara zu
bizian baino itxura
hobea daukazu. (bis)
S. Colina: Bizirikan ez neukan
itxura itzela
banekien mutiko
eskasa nintzela
baina zuri begira
ez harritu bela
ozpindu egin zara
ardoa bezela. (bis)
U. Iturriaga: Eman baitizkidazu
albotik ostiak!
Ardo botilak daude
hilda garestiak.
Zizareak mantendu
behar ditut bustiak
eskerrak luze irauten
duela whiskiak. (bis)
S. Colina: Ze nolako hildako
kalamidadeak!
Berpizten zaizkienak
abilidadeak.
Hartu itzazu nire
nitxo ta loreak
baina bakean utzi
nire zizareak. (bis)
U. Iturriaga: Honi ezin zaizkio
sinistu erdiak
hitzak ez ditu izan
sekula argiak;
zizareak aipatu
ta ez kontu garbiak
lehen be neure lurretan
baitzeuzkan ardiak. (bis)
Datu-base honetan eskainitako informazioari buruz jakiteko, kontsultatu lege oharra