Bertsoak - Fitxa ikusi Atal honi buruz gehiago jakiteko
1986-03-23 Donostia Txapelketa 17:00 [Bertsoa] / Xabier Amuriza, Iñaki Murua
| Bertsoa entzun |
1986-03-23 Donostia Txapelketa 17:00 [Bertsoa] / Xabier Amuriza, Iñaki Murua
Neurria:
Hamarreko handia (hg) / Bost puntuko handia (ip)
Kokapena:
XDZ - Xenpelar Dokumentazio Zentroa
Murua
Zu zaitugu gaur zeure hitzetan
herri hontako gudari,
baina ez diozu egoki heldu
egin behar zan lanari,
ez ezazula gauz hori egin
esaten ari ta ari,
nei ez didazu kaso egin da
itxi behar fabrika hori,
dirurik ez du ematen baina
zerrikeria ugari. (bis)
Amuriza
Ez da nahikoa korbatarekin
lantegian ibiltzea,
mailuarekin heldu al zara
niri sartzea iltzea,
ez da komeni krisis honetan
gure oihua isiltzea,
zuk zer nahiago duzun esazu
heldu bait zaigu trantzea,
zikinarekin jatea ala
garbian gosez hiltzea. (bis)
Murua
Nagusi honen jokabidea
degu benetan lizuna,
ispektoreak hori dala ta
ezarri behar izuna,
zeure burua goragi jaso
hau da gustatzen zaizuna,
urte osoan lapurreta bat
da egiten diguzuna,
langileari soldata eta
euskaldunoi osasuna. (bis)
Amuriza
Begira nor ta nola datorren
gaur osasunaren eske,
aizu laguna nire fabrika
ixterik ez zazu uste,
zaharrak kalera ari dirade,
lan gabe hainbeste gazte,
eskuak garbi dituzten batzuk
hemen hondatzen gaituzte,
beraz etorri zaren bidetik
berriro joan zintezke. (bis)
Murua
Zeurea egin, zeureai jarrai,
hau egiten dezu beti,
nagusi jauna gau eta egun
irabazien bideti,
errekak zikin, arraiak hilak
zikinkeri hoiengati,
bainan halare damu izpirik
ez dago zure aldeti,
zeure burua maite dezu zuk
gauza guztien gaineti. (bis)
Amuriza
Gauza guztien gainetik daude
neure aita eta ama,
seme alabentzat lantegi honek
bere ogia darama,
harrigarria zikin aitzakiz
zigortzera heldu dana,
karpeta hoiek utzi Madrilen
eta eman guri lana
eta orduan garbituko da
Euskadiko panorama. (bis)
Datu-base honetan eskainitako informazioari buruz jakiteko, kontsultatu lege oharra