1986-03-23 Donostia Txapelketa 11:30 [Bertsoa] / Jon Lopategi, Iñaki Murua

Zu Jon, gaztea oraindik, artzain zaude Urbian zeure aitarekin. Eta gaur goizean artzantza utzi eta Urbiatik alde egiteko duzun asmoaren berri eman diozu Murua, zeure aitari.

Deskribapena

Doinua

Kantore berri xarmant batzuek

Neurria / Estrofaren izena

Zortziko handia (hg) / Lau puntuko handia (ip)

Kokapena

Kokapena: XDZ - Xenpelar Dokumentazio Zentroa
Bilduma / Funtsa / Proiektua: Txapelketetako Bilduma

1986-03-23 Donostia Txapelketa 11:30 [Bertsoa] / Jon Lopategi, Iñaki Murua

Neurria: Zortziko handia (hg) / Lau puntuko handia (ip)
Kokapena: XDZ - Xenpelar Dokumentazio Zentroa

Lopategi
Gustora nagon zure onduan
egin zidazun galdera,
eta orduan nik begiratu
goialdetik be aldera,
konturaturik nolatan nuen
hemen urteen galera
makila bota basora eta
aita banoa kalera. (bis)
Murua
Urbi gainean bizi ginan gu
txistu ta soinua joaz,
aita ere pozik artzantzarako
semeak zuen gogoaz,
kalea ere seme maitea
bete zaigu arazoaz,
aita bakarrik hemen utzita
kalera zergatik zoaz? (bis)
Lopategi
Aita bakarrik manten lezake
oso ez bada erdiak,
baina satorrez jantzirik daude
hemen diren belardiak,
eta zer janik ez dadukate
behorrak eta ardiak,
muino gainetik guri parrezka
ikusten ditut erbiak. (bis)
Murua
Erbi horiek dira neretzat
zorionaren lekuko,
eta zuk berriz langintza honi
hala ere orain uko,
bildurra daukat kale zuloan
ote zeraden galduko,
hemen daukazun lasaitasunik
han ez dezu bilatuko. (bis)
Lopategi
Hola galtzeko ni mozolotzat
ez nazazu hartu, aizu!
Edo zertako izan zaitut nik
neure aita eta maisu?
Ogi faltaren bildurra duzu
egia garbi esaizu!
Kalian biltzen dudanetikan
zerbait etorriko zaizu. (bis)
Murua
Kale zuloan langabezia
orain jarri zaigun moda,
droga ta saltsa ugari dala
ekartzen dizut gogora,
han igartzen da ustekabean
sasoian dagoen lora,
alde egiteak utzi izazu,
zatoz aitaren ondora. (bis)
Lopategi
Zuk nahi zenduna egin zenduen
oraintxe da nire txanda,
piskat hegoak hazitakoan
neri ez jarri demanda,
Donosti hortan alperrikoa
nitzat droga propaganda,
sagardo ona edango dut nik
Hernani aldera joanda. (bis)
Murua
Sagardo eta parranda dezu
zure burmuinean beti,
seme zintzoa ez zabiltza gaur
aitak jarri zun bideti,
kalera zoaz artzai utzirik
aita zahar hau bakarti,
horrelakorik ez zaio egiten
maitatzen dan aita bati. (bis)

Datu-base honetan eskainitako informazioari buruz jakiteko, kontsultatu lege oharra

BDB Bertsolaritzaren datu-basea

Bertsoak - Fitxa ikusi Atal honi buruz gehiago jakiteko