Bertsoak - Fitxa ikusi Atal honi buruz gehiago jakiteko
2007-09-22 Legazpi Txapelketa [Bertsoa] / Mikel Arrillaga, Beñat Lizaso
2007-09-22 Legazpi Txapelketa [Bertsoa] / Mikel Arrillaga, Beñat Lizaso
Neurria:
Hamarreko txikia (hg) / Bost puntuko txikia (ip)
Kokapena:
XDZ - Xenpelar Dokumentazio Zentroa
M. Arrillaga: Iritsi zaigu opor
hauen bukaera;
etorri, maitemindu
ein nintzen gainera
baina orain morala
joan zait gainbehera;
Beñat egin nahi dizut
gaur zuzen galdera:
zer egingo behar dugu
bihartik aurrera?
B. Lizaso: Elkar ezagutuak
hondartza ertzean
zenbat maitetasun hitz
zutaz pentsatzean...
Bihar abitu eta
laister da etxean;
nik pena sentitzen det
hortaz ohartzean
baina gordeko zaitut
nere bihotzean.
M. Arrillaga: Orain joan behar det
oso urrutira
Noruega alderaino
jarri naiz begira;
nere aberriak nahiz ta
baduen diztira
joatea derrigorra
ere ez da tira;
bizitzera joan al
neike Azpeitira?
B. Lizaso: Mintzatu ondoren hain
modu erosoan
hurbiltzen ari zera
pausoan-pausoan;
zure hitzekin eta
maitasun goxoan
aukera hoberik ez dut
bizitza osoan
leku egingo dizut
nere ohetxoan.
M. Arrillaga: Baietz esan didazu
entzun dizut adi
ta horregatik jarri
naiz pozez kantari;
batera heldu beharko
orain bizitzari
egin beharko ditugu
guk planak ugari
ilusioz begiratuz
etorkizunari.
B. Lizaso: Biok eraiki behar
degu etorkizuna
elkarri luzatuaz
gure maitasuna;
nahiz ta jendeak beitu
ez jarri iluna
nere ondoan segi
ezazu laguna
eta jendeak esan
dezala nahi duna.
Datu-base honetan eskainitako informazioari buruz jakiteko, kontsultatu lege oharra