Bertsoak - Fitxa ikusi Atal honi buruz gehiago jakiteko
2005-10-22 Uztaritze Txapelketa [Bertsoa] / Onintza Enbeita, Fredi Paia
| Bertsoa entzun |
2005-10-22 Uztaritze Txapelketa [Bertsoa] / Onintza Enbeita, Fredi Paia
Neurria:
Zortziko txikia (hg) / Lau puntuko txikia (ip)
Kokapena:
XDZ - Xenpelar Dokumentazio Zentroa
O. Enbeita:
Hain arin nora zoaz
orain gauean zu?
Hemen ere lan batzuk
badituzu aizu!
Ogirako astirik
igual ez daukazu
baina masa eginda
utzi dezakezu. (bis)
F. Paia:
Lanerako ni ez naiz
batere nagia
etxera ekartzen dut
nola ez ogia;
nahiz ta goizegi dugun
igual gau erdia
gero ekarriko dizut
maite gosaria. (bis)
O. Enbeita:
Horrekin ezin utzi
gogoa kenduta
ezin zaitezke joan
gaur ni baztertuta.
Goizean omen zatoz
gosaria hartuta
tartean ze egingo dut
labea piztuta? (bis)
F. Paia:
Nahiz honetaz ez gendun
hitz egin sekula
nire barratxo hori
orain dago ahula.
Okina naiz maitea
arazo mardula
badakit lehenago
esan behar nizula. (bis)
O. Enbeita:
Ogia ikusten dut
gaur nik hain urruna
gezurra esan didazu
gauza ezaguna
ba utzi ogi gabe
etsai zein laguna
zure bizitzan ni naiz
orain lehentasuna. (bis)
F. Paia:
Hau da giro ederra
hau da marabila!
Lehenengo egunean
kriston iskanbila
independientea da
aurreko mutila
arin hasi zara zu
dibortzio bila. (bis)
O. Enbeita:
Dibortzio eskean
ni ez naiz hasiko
baina nire gogoa
beteko dut tinko
bada inguruetan
hainbeste mutiko
zuk gosaria ekarri
ta horrekin kito. (bis)
F. Paia:
Elkarrizketak dakar
haserraldi usai
orain artean zinen
maitasunaren gai
goizean etortzeko
izango nauzu gai
baina ez dut labean
beste ogirik nahi. (bis)
Datu-base honetan eskainitako informazioari buruz jakiteko, kontsultatu lege oharra