Bertsoak - Fitxa ikusi Atal honi buruz gehiago jakiteko
2009-10-18 Zarautz Txapelketa [Bertsoa] / Joxe Munduate, Iker Zubeldia
| Bertsoa entzun |
2009-10-18 Zarautz Txapelketa [Bertsoa] / Joxe Munduate, Iker Zubeldia
Neurria:
Zortziko handia (hg) / Lau puntuko handia (ip)
Kokapena:
XDZ - Xenpelar Dokumentazio Zentroa
I. Zubeldia
Aspertu ginen Europan zehar
kamionakin ibiltzen
ta orain gaude restop batean
geure kabinak garbitzen.
Ai lagun Joxe jokabide hau
ez det ondo entenditzen:
ze kristotako garbitzen degu
ez baldin badeu zikintzen?
J. Munduate
Nik erantzuten jakingo al det
zuk egindako galdera?
Egoerari hartzen diot nik
alperrikako tankera
trapua hartu ta ari gera
aurrera eta atzera...
Pazientzia bukatu behar zait
pinturarekin batera!
I. Zubeldia
Urte hauetan Europan zehar
eman degu hainbat gerra
errepidea izan zitekeen
zuzena ala okerra.
Xarma guztia galduta dago
nere kabina bazterra
dagoeneko pipiak jan dit
Cindy Crawford-en posterra.
J. Munduate
Posterrak duen dizdirak ez nau
lehenago hainbeste pozten
ikusten baitut egun gogorrak
ilaran nola datozten.
Ez da erreza mantendu eta
familia ondo jazten
ta okerrena: argi izpirik
oraindik ez da ikusten.
I. Zubeldia
Ez zazu etsi lagun Josetxo
oraindik zaude gaztea
ez da komeni edade hortan
burutik raso nahastea.
Komeni zaigu irtenbideen
bila lehenbailehen hastea
onena degu kamiona saldu
ta ehun ardi erostea.
J. Munduate
Igual kamioiak saltzea ez da
izango gure kalteko
baina laguna zerbait badaukat
gaurkon zuri esateko:
bitatikan bat salduko degu
ta bestea aparteko
igual gaizki ez da etorriko
ardiak eramateko!
Datu-base honetan eskainitako informazioari buruz jakiteko, kontsultatu lege oharra