Bertsoak - Fitxa ikusi Atal honi buruz gehiago jakiteko
2009-11-22 Iruñea Txapelketa [Bertsoa] / Amets Arzallus, Aitor Mendiluze
Bertsoa entzun |
2009-11-22 Iruñea Txapelketa [Bertsoa] / Amets Arzallus, Aitor Mendiluze
Neurria:
Hamarreko handia (hg) / Bost puntuko handia (ip)
Kokapena:
XDZ - Xenpelar Dokumentazio Zentroa
A. Arzallus
Jaio orduko sentitu nitun
gorpuzkeran mutil antzak
baina neskara tiratzen zidan
gorputz barruko arantzak
neskekin neuzkan sentimentuak
eta berdin konfiantzak.
Orain konsulta atari hontan
lege-galderen balantzak...
Azken orduan beti zergatik
bisitatzen nau zalantzak?
A. Mendiluze
Zalantzarik ez baina ezetzak
izan ditugulako lehen
baiezkoari orain zalantza
gehitu egin zaio hemen
bainan aurretik nik zenbat amets
egingo ote nituen...
Behin heldu eta hara eskua
dardarka daukat nabarmen
baina ez dakit bildurra edo
ilusioa ote den.
A. Arzallus
Ilusioa zeure barruan
ere erdi dudan omen
neroni ere irripartxo bat
zimurtuta nago hemen.
Neska izan nahi dut ni neska bainaiz
konfiantza ta sinesmen
baina Aitor badut beste kezka bat
galdera denetan goren:
zoriontsua izango al naiz
ebakuntzaren ondoren?
A. Mendiluze
"Zoriontsua izango al naiz?"
lau hitz oso nabarmenak
urte hauetan zure barruan
indartuz joan direnak.
Honek ez ditu kenduko noski
betirako gure penak
baina berdinak izango dira
behingoan irudi denak
gure arimak ikusiak ta
gure ispiluarenak.
A. Arzallus
Tira ba berriz sartu gaitezen
tren berrien abenturan
geroan oso zoriontsuak
izango garen menturan.
Ametsek ez du sexu izenik
beraz zertan egon dudan?
Baina lehen Aitor hots egin dizut
eta ximurtxo bat zugan...
Zuk esaidazu ze izenekin
hots egin behar dizudan.
A. Mendiluze
Eider nahi nuke baina izenak
kasik denak dira onak
edozein neska-izen on baitu
bihurtzekotan dagonak.
Hainbat denboraz ez al gera ba
gu horretxen zai egonak?
Utzi ditzagun behingoz dardarak
ta behartutako bromak.
Zure txanda da zoaz barrura
animo ta zorionak!
Datu-base honetan eskainitako informazioari buruz jakiteko, kontsultatu lege oharra