BDB Bertsolaritzaren datu-basea

Informazio orokorra

Kategoria

Bat-batekoa

Aldizkako Ekitaldia (Saioarena)

Bertsolari Txapelketa Nagusia (15. 2009)

Saioa

2009-12-13 Barakaldo Txapelketa 11:00

Gai-emailea

Rekondo, Alaitz

Bertsolariak / Egileak

Lujanbio, Maialen

Maia, Jon

Lana

Binaka gaia-emanda

Jarritako gaia

Ezkontza batean dantzan hasi zarete. Jon, zuk nahi baino estuago heltzen dizu Maialenek.

Deskribapena

Doinua

Orioko balearena

Neurria / Estrofaren izena

Zortziko txikia (hg) / Lau puntuko txikia (ip)

Kokapena

Kokapena

XDZ - Xenpelar Dokumentazio Zentroa

Bilduma / Funtsa / Proiektua

Txapelketetako Bilduma

2009-12-13 Barakaldo Txapelketa 11:00 [Bertsoa] / Maialen Lujanbio, Jon Maia

Neurria:  Zortziko txikia (hg) / Lau puntuko txikia (ip) 
Kokapena:  XDZ - Xenpelar Dokumentazio Zentroa 

---

J. Maia

Haseran Arin arin
ta gero Fandago
gero gogor helduta
hiruzpalau tango
estutzen dizkidazu
hemengo ta hango...
Lasai egon maitea
ez naiz-eta joango! (bis)


M. Lujanbio

Aspaldi ikutu gabe
nabil hala-modu
hau gaztetxoa zan lehen
ta nola gizondu!
Gerria guri-guri
tripa ere ondu...
Guapo! Nahi al zenduke
nerekin ezkondu? (bis)

J. Maia

Baina kargarik ez zait
oraindik arintzen
eta lepoa ere
jada daukat mintzen
erantzun ziurrikan
ez dizut agintzen
ezkonduko nintzake
ez banauzu hiltzen. (bis)

M. Lujanbio

Nola hilko zaitut ba
helduta ondotik!
Maitatu egingo zaitut
luzaro gogotik...
Besoak lo hartu dit
zintzilik lepotik
ia helduko dizut
belarritakotik. (bis)

J. Maia

Nola gure altura
ezin den konpara
nere lepo hontatik
estu lotu zara
ta jirafaren pare
ipini zait jada
hau ez da agarraua
hau urkatua da! (bis)

M. Lujanbio

Badauka bai zeozer
torturaren kutsu
azelerau zaizkizu
bihotz eta pultsu.
Hartu besotan eta
eman neri muxu
eta orduan gustoz
itoko zaitut zu. (bis)