Bertsoak - Fitxa ikusi Atal honi buruz gehiago jakiteko
1988-08-20 Goizueta Jaialdia [Bertsoa] / Joxe Fermin Argiñarena, Pablo Joxe Aristorena, Manolo Arozena, Imanol Lazkano, Sebastian Lizaso, Jon Lopategi
1988-08-20 Goizueta Jaialdia [Bertsoa] / Joxe Fermin Argiñarena, Pablo Joxe Aristorena, Manolo Arozena, Imanol Lazkano, Sebastian Lizaso, Jon Lopategi
Neurria:
Zortziko handia (hg) / Lau puntuko handia (ip)
Kokapena:
XDZ - Xenpelar Dokumentazio Zentroa
Lizaso
Askorentzako emakumea
haurrak e(g)iteko makina,
baina neretzat eskubidetan
gizonezkoen berdina,
eta neretzat nik zer nahi detan
esanez hau da mitina:
gizonezkoan hutsegiteak
errez barkatzen dakina.
Lopategi
Hutsagitetan errez jauzten da
gizonezkoaren jira,
emakumea, maitasun hori,
ez zazu inoiz erretira,
nere bihotza zabal da beti
lore hoieri begira,
eta gehienak gustatzen zaizkit
borondatetsu badira.
Lazkano
Emakumeak gure eskubide
berdinetan balirake,
zalantzarikan ez dut batere
denok hobeki ginake,
baina barkatzen jakitez gero
gure hutseginen truke,
apaizek baino barkamen gehigo
eman beharko lukete.
Argiñarena
Gure andreak, lagun Lazkano,
bazekitek bai barkatzen,
estualditan oso maitakor
nola gaitun besarkatzen,
pikaro samar jokatzen degu
ta horrekin naiz kezkatzen,
sentzila behintzat izan dadila
besterik ez det eskatzen.
Aristorena
Neronek oraindik asko ez dut
emakumeen dotrina,
baina halare egina daukat
maite dudan imajina,
izan dedila euskaldun ona
langilea eta fina,
izan dedila eman bezela
berak e(re) hartzen dakina.
Arozena
Esijentziak haunditzen ere
ez naiz askorik aritzen,
edozertako tokatu ere
gaur ez da inor harritzen,
tarteka a(r)i naiz lehen daukatena(r)i
ta beste batzuei beitzen,
gutxieneko jakin dezala
arrautza batzuk prejitzen.
Lizaso
Gizonezkoak bakardadean
ez daduka zer eginik,
amarengandik hasi begira
zer degu haren berdinik,
Goizuetako andrezko danak
utzi nahi ditut jakinik,
nahizta Lizaso inork ez maite
denak maite zaituztet nik.
Lopategi
Maitagarriak dira izan ere
nola egun hala gaba,
nahiz ta noizbehinka jartzen diguten
oztopoa edo traba,
geu golfo izan eta aingeru
batzun bila joaten gara,
eta emakume txar asko ez da
norbera gizona bada.
Lazkano
Nunbait nahi zuen sentimentuak
guk azaltzea kanpora,
galdetu digu zer ote leike
bakoitzak gustoko lora,
eskerrak bera(r)i galdetutzea
honi ez zaiola gogora,
bestela ziur ginake bai gu
lista hortatik kanpora.
Argiñarena
Emakumeak ez du behar da
inoiz gizonan esklabo,
hori gertatzen baldin bada inoiz
maitasun danak akabo,
emakumearen alde mintza
naiz gaur baino lehenago
nerea ni hainbeste bada ta
ni oso konforme nago.
Aristorena
Konforme dago beraz gizona
zuhurra eta apala,
neronek berriz ez daukat eta
kezketan nabil zabala,
emakumerik ez dut neurtzen
neska orok jakin dezala,
bat maite banu, maiteko nuke
soilik bera dan bezala.
Arozena
Emakumeen meritu asko
hartzen ditugu serio,
edo bestela gure ondotik
egingo dute adio,
sentimentutan baikorra nahi dut
edo zer erremedio,
gure erristak aguantatzeko
denak ez dute balio.
Datu-base honetan eskainitako informazioari buruz jakiteko, kontsultatu lege oharra