Bertsos - View details To know more about this section
2002-10-31 Beasain Jaialdia [Bertsoa] / Sebastian Lizaso, Maialen Lujanbio
| Bertsoa entzun |
2002-10-31 Beasain Jaialdia [Bertsoa] / Sebastian Lizaso, Maialen Lujanbio
Stanza name:
Zortziko txikia (hg) / Lau puntuko txikia (ip)
Localization:
XDZ - Xenpelar Dokumentazio Zentroa
Lujanbio:
Bihar ezkonduko naiz
badakizu, jakin
nere eraztun dotore
ta nere traje fin..
Biharko egunari
nahi nioke ekin
animoz eta goxo
zure ipuiakin. (bis)
S. Lizaso:
Kupido iritsi zen
zure bihotzera
eta hargatik zoaz
bihar ezkontzera.
Umetan amets egin
zenuen antzera
bihar denen erregin
zeu izango zera. (bis)
Lujanbio:
Bihar denen erregin
ta izar gorena
aldarean barrena
igoko naizena?
Lehen kapituloan
polita da dena
zer moduzkoa ote da
berrogeigarrena? (bis)
S. Lizaso:
Ezkon bizitzan behar
zuk ere moldatu
eta hasieratik
ez zaitez nekatu.
Batetik berrogeira
kolpera ez pasatu
gozatu nahi badezu
banaka kontatu.(bis)
Lujanbio:
Minutu ta orduak
harturik gertuko
urtez urte joateai
nola egin uko?
Pixkana joango gera
aita zu lekuko
ta printzea ez zait ba
igel bihurtuko? (bis)
S. Lizaso:
Zure ezkontzak badu
besteenan antzik
ez zera berezia
ez izan zalantzik
eta printzearekin
zertan esperantzik?
Ez da igel izango
golforen bat baizik. (bis)
Lujanbio:
Nere senarrarekin
a ze panorama!
Aita nik onartzen det
ematen didana.
Ipui eske nijoa
berriz zuengana:
zuena zer izan da
ipuia edo drama? (bis)
S. Lizaso:
Denetatik izan du
gureak berekin
eta zurea ere
izango da berdin
baina aspergarria
bihurtu ez dadin
lehengo ametsak bete
ta berriak egin. (bis)
Lujanbio:
Amets ez egitea
da guretzat kalte
ezkonberriek behintzat
poz hori daukate.
Ez ahal zait bihurtuko
bihar, etzi, noizbait'e
urrezko eraztuna
burdinezko kate! (bis)
S. Lizaso:
Kezka atera zaizu
bihotz barrenetik
baietzik ezin esan
gaur aitak kolpetik
baina nik kontseju bat
ta hara zergatik:
zu zeu izaten segi
ezkonduagatik. (bis)