Bertsos - View details To know more about this section
2003-01-05 Oñati Jaialdia [Bertsoa] / Amets Arzallus, Jexux Mari Irazu Muñoa
Bertsoa entzun |
2003-01-05 Oñati Jaialdia [Bertsoa] / Amets Arzallus, Jexux Mari Irazu Muñoa
Stanza name:
Zortziko handia (hg) / Lau puntuko handia (ip)
Localization:
XDZ - Xenpelar Dokumentazio Zentroa
J.M. Irazu:
Marruecostik etorri nintzan
zure lantegi ertzera
konstrukzioan hor ibiltzen naiz
batera eta bestera.
Zure jainkoa nunbait dirua
hortik kontuak atera
ni esplotatzen egun osoan
errezatzen aitzen zera.
A. Arzallus:
Belaunikatu ta errezatzen
pasa ohi dezu eguna
Ala batera, Ala bestera
Ala du bere kuttuna.
Baina errezoak utzi beharko
dituzu nere laguna
Ala ez baita gure enpresa
aurrera aterako duna.
J.M. Irazu:
Beste jainkon bat izango dezu
hori ez da nobedade
gu musulmanak maiz errezatzen
horretan ohituta gaude.
Alak enpresa ezin atera
pixka batean hor zaude...
Ezin nezake lanik egin nik
Alaren laguntzik gabe.
A. Arzallus:
Jator ustetan hartu nuen ta
atera zait erdi kirten
egun osoan hor jarduten da
buruari eragiten.
Zenbat laguntzen ote dizun hark
ez dago zaila jakiten
ahal dezun dena lagunduta're
ez baitezu ezer egiten.
J.M. Irazu:
Nik ez dedala asko egiten
esan modu alaiean
itxuraz noizbait zuk egin zendun
lana behar zan garaiean.
Nere errezua ukatu dezu
hemen aiean-aiean
gero elizara joango zera
dena zuritu nahiean!
A. Arzallus:
Honek etxean uzten du indarra
etxean uzten du funtsa.
Hara ederki ulertzen dezu
nagusiaren hizkuntza.
Kale gorria hortxe daukazu
ta segiozu haruntza
eta orduan nahi dezunari
galdetuiozu laguntza.